عۇمىرىندا شاشىن قيىپ كورمەگەن 87 جاستاعى نۇرشارۋان تۇستىكباەۆا تالدىقورعان قالاسىندا تۇرادى. اجەيدىڭ بۇرىمىنىڭ ۇزىندىعى 2 مەترگە جۋىق. كەيۋانا قازاقپارات تىلشىسىنە شاشتىڭ كۇتىمى مەن كيەسى جايلى ايتىپ بەردى.
كەيىپكەرىمىزدىڭ ايتۋىنشا، شاشى ۇزىن قىز-كەلىنشەكتەردىڭ بويىندا جۇمساقتىق، مەيىرىم، بايىپتىلىق، كەشىرىم سياقتى قاسيەتتەر بولادى.
«عالىمدار قازىر ۇزىن شاشتىڭ قاسيەتى تۋرالى ايتا باستادى. ال ءبىزدىڭ اتا-بابامىز ونى باياعىدا زەرتتەپ، دالەلدەپ قويعان. قىزدارىنىڭ شاشىن قيماعان، بۇرىمدىلاردى ەرەكشە قۇرمەت تۇتقان. بۇرىن قازاق قىزدارى بەلىنەن اسقان شاشتى كەسۋدى جامان ىرىم ساناعان. سەبەبى، ۇزىن شاشتى ورىنسىز كەسۋ ادامنىڭ جولىن كەسىپ، قاسىرەتكە ۇشىراتۋى مۇمكىن. ەڭ الدىمەن، ۇزىن شاش - ايەل كوركى. سونداي-اق شاشى ۇزىن قىز-كەلىنشەكتەردىڭ مىنەزى جۇمساق، مەيرىمدى، جاناشىر، سابىرلى بولادى»،- دەيدى نۇرشارۋان تۇستىكباەۆا.
كەيۋانانىڭ سوزىنشە، شاشىنىڭ ۇزىندىعى بۇگىندە 2 مەترگە جۋىق.
«شاشىمدى تارقاتسام جەرگە تۇسەدى. ەكى مەترگە جۋىقتادى. شاشتى دۇرىس كۇتۋ كەرەك. ءبىزدىڭ زامانىمىزدا قازىرگىدەي نەشەتۇرلى سۋسابىن مەن مايلار بولعان جوق. دەسەك تە، قولدا باردى قولداندىق. شاشىمىزدى ايراننىڭ سارى سۋىمەن جۋاتىنبىز، ءالى دە سولاي ىستەيمىن. سوسىن جاقسىلاپ كەپتىرىپ، ءورىپ، جيناپ تاستايمىن. ەشقاشان شاشىمدى جايىپ ءجۇرىپ كورمەپپىن. باسىمنان جاۋلىعىم تۇسكەن ەمەس. بۇگىن سىزدەر ءۇشىن شاشىمدى تارقاتىپ كورسەتەيىن دالەل بولسىن»،- دەپ كۇلدى تالدىقورعاندىق اجەي.
ءبىر اۋلەتتىڭ بەرەكەسى مەن ۇيىتقىسىنا اينالعان كەيۋانانىڭ بۇگىندە 29 نەمەرە، 41 شوبەرەسى بار. كوبى - قىز بالالار.
“ادىرنا” ۇلتتىق پورتالى
