الماتى وبلىسى تالدىقورعان قالاسىنداعى №4 مەكتەپتە بولعان وقيعا تۋرالى قر ءبىلىم جانە عىلىم مينيسترلىگى پىكىر ءبىلدىردى، دەپ جازادى "ادىرنا" ۇلتتىق پورتالى.
"11 ناۋرىز كۇنى بيولوگيا ساباعىندا 2005 جىلى تۋىلعان وقۋشى مۇعالىممەن قاتتى داۋىسپەن بالاعات سوزدەر ايتىپ سويلەسكەن. مۇعالىم تالدىقورعان قالاسىنىڭ پوليتسيا بولىمىنە ارىز جازعان. قازىرگى تاڭدا وقۋشىعا قاتىستى قر اقبتك-ءنىڭ 434-بابىنىڭ 1-بولىگى (ۇساق بۇزاقىلىق) بويىنشا اكىمشىلىك حاتتاما تولتىرىلدى. شەشىمدى الماتى وبلىسىنىڭ كامەلەتكە تولماعانداردىڭ ىستەرى جونىندەگى مامانداندىرىلعان اۋدانارالىق سوتى قابىلدايدى.
ەستەرىڭىزگە سالا كەتەيىك، كامەلەتكە تولماعان بالالاردىڭ ءىس-ارەكەتتەرى ءۇشىن اتا-انالاردىڭ جاۋاپكەرشىلىگى قاراستىرىلعان. وسى ىسكە بايلانىستى وقۋشىنىڭ اتا-اناسىن جاۋاپكەرشىلىككە تارتۋ ءۇشىن اكىمشىلىك ءىس قوزعالدى. سونىمەن قاتار بەلگىلەنگەن تارتىپپەن وقۋشىنى ەسەپكە قويۋ جانە وعان پسيحولوگيالىق كومەك كورسەتۋ تۋرالى ماسەلە دە قارالادى. ايتا كەتەيىك، مۇعالىمدەرگە دەگەن مۇنداي كوزقاراسقا جول بەرىلمەيدى. تەك مۇعالىمدەر عانا ەمەس، اتا-انالار دا بالالارمەن قوعامدا ءوزىن قالاي ۇستاۋ كەرەگى تۋرالى اڭگىمەلەر جۇرگىزۋى ماڭىزدى", - دەلىنگەن مينيسترلىك حابارلاماسىندا.
"ادىرنا" ۇلتتىق پورتالى
