"ۋكراينانىڭ ۇلى وتان سوعىسىنىڭ 17-ءشى كۇنى ءوتتى. رەسەيلىك باسقىنشىلار ۋكرايندىقتاردى باعىندىرا المادى جانە باعىندىرا المايدى دا، بۇل ءبىزدىڭ تابيعاتىمىز بەن مىنەزىمىزگە قايشى". بۇل تۋرالى زەلەنسكي حالىققا ارناعان جاڭا ۆيدەو ۇندەۋىندە حابارلادى. ول ۋكراينا ەشقاشان «ل/دنر-عا» اينالمايتىنىن، ال رەسەي پسەۆدورەسپۋبليكالاردىڭ انالوگىنا اينالىپ بارا جاتقانىن اتاپ ءوتتى، دەپ جازادى "ادىرنا" ۇلتتىق پورتالى.
پرەزيدەنت باسقىنشىلاردىڭ ۋكراينا مەملەكەتىن جاۋلاپ الۋعا كۇشى جەتپەيتىنىن، ويتكەنى ولار تەك زورلىق-زومبىلىققا، تەررورعا، قارۋ-جاراققا سۇيەنەتىنىن باسا ايتتى.
"رەسەي باسشىلىعى شىن مانىندە ءوز مەملەكەتىن بۇكىل الەمنەن وقشاۋلانعان ۇلكەن ايماققا اينالدىرىپ وتىر. وندا كەدەيلىك ورنايدى. بارلىعى تەك زورلىق-زومبىلىقپەن انىقتالاتىن بولادى جانە ول جەردەن ادامدار قولدارىنان كەلگەنشە، شامالارى جەتكەنشە قاشا باستايدى", - دەپ مالىمدەدى پرەزيدەنت.
ونىڭ ايتۋىنشا، اگرەسسياعا بايلانىستى قاتاڭ سانكتسيالارعا ۇشىراعان ەل قازىر اقىل-ويدان، تالانتتان، اقشادان ايىرىلىپ جاتىر. سونىمەن قاتار زەلەنسكي باسقىنشىلاردىڭ حەرسون وبلىسىندا حالىقتىڭ ەركىنە قارسى «دنر» مەن «لنر» انالوگىن جاساۋعا تىرىساتىنى تۋرالى ايتىپ، جاۋمەن ىنتىماقتاسۋعا كەلىسەتىن جەرگىلىكتى دەپۋتاتتار شىعاتىن بولسا، ولارعا قارسى ۇكىم شىعاتىنىن باسا ايتتى.
"ەگەر ولاردىڭ بىرەۋى كەنەتتەن باسىپ الۋشىلاردىڭ ۇسىنىستارىنا ازعىرىلسا... ءسىز ءوزىڭىز ءۇشىن ۇكىمگە قول قوياسىز. ۇكىم - ۋكرايناعا نەلىكتەن قول سۇعىلماۋ كەرەكتىگىن ۋاقىتىندا تۇسىنە الماعان 12 مىڭنان استام باسقىنشىنىڭ سوڭىنان ەرۋ", – دەدى مەملەكەت باسشىسى.
"ادىرنا" ۇلتتىق پورتالى
