Adal ساياسي پارتياسى Amanat پارتياسىنا قوسىلۋعا شەشىم شىعاردى، - دەپ حابارلايدى “ادىرنا” ۇلتتىق پورتالى.
پارتيانىڭ الەۋمەتتىك جەلىسىندە مالىمەتى بويىنشا، Adal پارتياسى مۇشەلەرىنە پرەزيدەنت قاسىم-جومارت توقاەۆتىڭ جۇمىس ءستيلى ۇنايتىنى جازىلعان.
"ول قازىر ادىلەتتى مەملەكەت قۇرۋدى كوزدەپ وتىر. مەملەكەت باسشىسىنىڭ بۇگىنگى قازاقستان حالقىنا جولداۋى اياسىندا ايتقان ساياسي رەفورمالارى سونىڭ تاعى ءبىر دالەلى. بىراق بۇل ايتىلعان رەفورمالار قالاي جۇزەگە اسىرىلادى؟ ماسەلە وسىندا. ول ءۇشىن بۇكىل قازاق قوعامى بىرىگۋى قاجەت. پرەزيدەنت رەفورمالارىنىڭ جەرگىلىكتە جەردە ءتيىستى دەڭگەيدە ىسكە اسىرىلماي قالۋ قاۋىپى جوعارى. قاسىم-جومارت كەمەلۇلى ايتقان "دوستارعا - ءبارىن، قالعانىنا زاڭ بويىنشا" دەگەن قاعيدامەن كەلگەن قوعامنىڭ وتكەنىن ۇمىتپاۋىمىز كەرەك. سول ءۇشىن، ءبىز، ادالدىقتار جاڭا قازاقستاندى قۇرۋعا بەلسەندى قاتىسىپ، ەلىمىزدەگى وڭ وزگەرىسكە ۇلەس قوسقىمىز كەلەدى.
پارتيالاستارىمىزبەن اقىلداسا كەلە، بۇگىن Adal-دىڭ ساياسي كەڭەسىندە پرەزيدەنتتىك Amanat پارتياسىنا قوسىلۋ تۋرالى ءبىراۋىزدان شەشىم قابىلدادىق", - دەلىنگەن جازبادا.
“ادىرنا” ۇلتتىق پورتالى
