كەشە پرەزيدەنت قاسىم-جومارت توقاەۆ «جاڭا قازاقستان: جاڭارۋ مەن جاڭعىرۋ جولى» اتتى جولداۋىندا نەگىزگى باسىم باعىتتاردى ناقتىلاپ بەردى. ساياسي جۇيەنى مودەرنيزاتسيالاۋعا باعىتتالعان مەملەكەت باسشىسىنىڭ تاپسىرمالارىن ىسكە اسىرۋ اياسىندا بۇگىن وبلىس اكىمى گۇلشارا ابدىقالىقوۆانىڭ توراعالىعىمەن اكتيۆ جيىنى ءوتتى، دەپ جازادى "ادىرنا" ۇلتتىق پورتالى.
ايماق باسشىسى الداعى ۋاقىتتا جۇزەگە اسىرىلاتىن ساياسي رەفورمالاردىڭ جاڭا باعدارلاماسىنىڭ ماڭىزدى ەكەنىن ايتىپ، ەرەكشەلىكتەرىنە توقتالدى. وبلىس ەكونوميكاسىنىڭ دامۋىنا وڭ اسەرىن تيگىزەتىن ساياسي قۇجاتتا ايتىلعان مىندەتتەردى جۇزەگە اسىرۋ ءۇشىن بىرلەسكەن جۇمىستاردىڭ قاجەت ەكەنىن العا تارتتى.
- مەملەكەت باسشىسى پارلامەنتتىڭ ءرولىن كوتەرۋ، پارتيالىق جۇيەنى دامىتۋ مۇمكىندىكتەرىن كەڭەيتۋ، سايلاۋ پروتسەسىن بويىنشا ناقتى تاپسىرمالاردى مىندەتتەدى. ءبىزدىڭ ايماقتا بيىل 22 اۋىلدىق وكرۋگ اكىمىنىڭ سايلاۋ ناۋقانى ۇيىمداستىرىلادى. ونىڭ ىشىندە 27 ناۋرىزدا 3 اۋىلدىق وكرۋگ اكىمى سايلانادى.
پرەزيدەنت الداعى ۋاقىتتا ەلىمىزدە جاڭادان 3 وبلىستىڭ قۇرىلاتىنىن ايتتى. جولىمىز تۇيىسەتىن جەزقازعان قالاسى ەندى ۇلىتاۋ وبلىسىنىڭ ورتالىعى بولسا، سىر وڭىرىنە دە ەكونوميكالىق جاعىنان وڭتايلى بولادى دەپ سانايمىن. وسى رەتتە كەلەسى ايدا باستالاتىن «قىزىلوردا-جەزقازعان» تاس جولىنىڭ قۇرىلىسى جاڭا مۇمكىندىكتەرگە جول اشادى دەپ سانايمىن.
ءبىزدىڭ الدىمىزدا ءوڭىرىمىزدىڭ دامۋى ءۇشىن داعدارىسقا قارسى كەزەك كۇتتىرمەيتىن شارالاردى شەشۋدىڭ ءتيىمدى تەتىكتەرىن قاراستىرىپ، جۇزەگە اسىرۋ مىندەتى تۇر. ونىڭ ىشىندە ازىق-تۇلىك قاۋىپسىزدىگىن قامتاماسىز ەتۋ مەن كوكتەمگى ەگىن ەگۋ جۇمىستارىن جۇيەلى جۇرگىزۋىمىز قاجەت، - دەدى گۇلشارا ابدىقالىقوۆا.
وبلىس اكىمى جيىن بارىسىندا ورىنباسارى باحىت جاحانوۆقا ازىق-تۇلىك تاۋارلارى باعاسىنىڭ شارىقتاۋىنا، ونىڭ ىشىندە قانت باعاسىنىڭ سپەكۋلياتيۆتى وسۋىنە بايلانىستى بارلىق دەلدالدىق سحەما اياسىندا تەكسەرۋ جۇرگىزۋدى جۇكتەدى. سونداي-اق، كوكتەمگى دالا جۇمىستارى مەن ەگىن ەگۋگە قاتىساتىن اۋىل شارۋاشىلىعى تەحنيكالارىنىڭ دايىندىعىن، قاجەتتى تۇقىممەن، مينەرالدى تىڭايتقىشتارمەن، جانار-جاعارمايمەن قامتاماسىز ەتۋ، سۋ الۋ ناۋقانىنا دەيىن سۋ تارتاتىن ناسوس قوندىرعىلارىن الۋ جۇمىستارىن پىسىقتاۋدى تاپسىردى.
تاعى ءبىر مىندەت – باق الەۋەتىن كوتەرۋ. ءوڭىر باسشىسى وسى سالاعا جەتەكشىلىك ەتەتىن ورىنباسارى قايرات نۇرتايعا جۋرناليستەر ارقىلى ءوڭىر تاراپىنان سالالىق مينيسترلىككە باق تۋرالى زاڭعا وزگەرىس ەنگىزۋگە ۇسىنىس جولداۋدى تاپسىردى. سونداي-اق، وبلىستاعى ازاماتتىق قوعامدى دامىتۋ ءۇشىن جۇيەلى جانە كەشەندى جۇمىس جوسپارىن ازىرلەپ، مەملەكەتتىك ەتنوساياساتتى جەتىلدىرۋ ماقساتىندا قوعامدىق قۇرلىمداردىڭ قىزمەتىن وزەكتەندىرۋدى جۇكتەدى.
جيىندا وبلىستىق ءماسليحات حاتشىسى ناۋرىزباي بايقاداموۆ جەرگىلىكتى ءماسليحاتتاردىڭ ءرولىن كۇشەيتۋ، قوعام ىشىندە ساياسي مادەنيەتتىڭ قالىپتاسۋىنا نەگىز بولاتىن ساراپشىلىق كوزقاراستاعى ازاماتتارمەن بىرلەسكەن شارالاردى ىسكە اسىرۋدىڭ وزەكتى ەكەنىنە توقتالدى.
ال، وبلىستىق ءماسليحات دەپۋتاتى، «سىر مەديا» جشس باس ديرەكتورى امانجول وڭعارباەۆ باق-تىڭ باسەكەگە قابىلەتتىلىگىن ارتتىرۋدا جۋرناليست مارتەبەسىن كوتەرۋ، مەدياونىمدەردىڭ ساپالىق قۇرامىنا تالداۋ جاساۋ جۇمىستارىن جەتىلدىرۋ باعىتىندا ۇسىنىسىن ورتاعا سالدى.
سونداي-اق، «Dalatex» جشس ديرەكتورى، مەتسەنات دىنمۇحامەد ابيزوۆ مەملەكەت پەن بيزنەس، مەملەكەت پەن حالىق اراسىندا كونسترۋكتيۆتى ديالوگ ورناتۋدىڭ وڭتايلى ادىستەرىنە كوڭىل ءبولۋدىڭ قاجەتتىلىگىن قاپەرگە سالدى. ال، نەمىس ەتنومادەني بىرلەستىگىنىڭ بەلسەندىسى سۆەتلانا كريۋگەر ءوڭىر دامۋىنا تىڭ سەرپىن بەرەتىن باستامالاردى بىرلىكپەن اتقارۋعا ءاربىر ازاماتتىڭ بەلسەندىلىگى كەرەك ەكەندىگىن تىلگە تيەك ەتتى. قورقىت اتا اتىنداعى قىزىلوردا ۋنيۆەرسيتەتىنىڭ پرورەكتورى جاندوس بازارتاي جاستار ءۇشىن ناقتى ىسكە نەگىزدەلگەن جوبالاردى ەلمەن ەتەنە ارالاسۋعا سەپ بولاتىن الاڭداردا تالقىلاۋدىڭ ماڭىزى زور ەكەنىن جەتكىزدى.
اكتيۆ وتىرىسىنىڭ سوڭىندا گۇلشارا ابدىقالىقوۆا جولداۋدا جۇكتەگەن مىندەتتەردى ساراپشىلىق ورتادا تالقىلاپ، سىندارلى ديالوگ ورناتۋعا شاقىردى. سونداي-اق، پرەزيدەنت تاپسىرمالارىن ساپالى ءارى ناتيجەلى جۇزەگە اسىرۋدا ءاربىر ازاماتتىڭ جاۋاپكەرشىلىگى جاڭا قازاقستاننىڭ جاڭعىرۋعا جول اشاتىنىن ەسكە سالدى.
"ادىرنا" ۇلتتىق پورتالى
