Keshe Prezıdent Qasym-Jomart Toqaev «Jańa Qazaqstan: Jańarý men jańǵyrý joly» atty Joldaýynda negizgi basym baǵyttardy naqtylap berdi. Saıası júıeni modernızaııalaýǵa baǵyttalǵan Memleket basshysynyń tapsyrmalaryn iske asyrý aıasynda búgin oblys ákimi Gúlshara Ábdiqalyqovanyń tóraǵalyǵymen aktıv jıyny ótti, dep jazady "Adyrna" ulttyq portaly.
Aımaq basshysy aldaǵy ýaqytta júzege asyrylatyn saıası reformalardyń jańa baǵdarlamasynyń mańyzdy ekenin aıtyp, erekshelikterine toqtaldy. Oblys ekonomıkasynyń damýyna oń áserin tıgizetin saıası qujatta aıtylǵan mindetterdi júzege asyrý úshin birlesken jumystardyń qajet ekenin alǵa tartty.
- Memleket basshysy Parlamenttiń rólin kóterý, partııalyq júıeni damytý múmkindikterin keńeıtý, saılaý proesin boıynsha naqty tapsyrmalardy mindettedi. Bizdiń aımaqta bıyl 22 aýyldyq okrýg ákiminiń saılaý naýqany uıymdastyrylady. Onyń ishinde 27 naýryzda 3 aýyldyq okrýg ákimi saılanady.
Prezıdent aldaǵy ýaqytta elimizde jańadan 3 oblystyń qurylatynyn aıtty. Jolymyz túıisetin Jezqazǵan qalasy endi Ulytaý oblysynyń ortalyǵy bolsa, Syr óńirine de ekonomıkalyq jaǵynan ońtaıly bolady dep sanaımyn. Osy rette kelesi aıda bastalatyn «Qyzylorda-Jezqazǵan» tas jolynyń qurylysy jańa múmkindikterge jol ashady dep sanaımyn.
Bizdiń aldymyzda óńirimizdiń damýy úshin daǵdarysqa qarsy kezek kúttirmeıtin sharalardy sheshýdiń tıimdi tetikterin qarastyryp, júzege asyrý mindeti tur. Onyń ishinde azyq-túlik qaýipsizdigin qamtamasyz etý men kóktemgi egin egý jumystaryn júıeli júrgizýimiz qajet, - dedi Gúlshara Ábdiqalyqova.
Oblys ákimi jıyn barysynda orynbasary Bahyt Jahanovqa azyq-túlik taýarlary baǵasynyń sharyqtaýyna, onyń ishinde qant baǵasynyń spekýlıatıvti ósýine baılanysty barlyq deldaldyq shema aıasynda tekserý júrgizýdi júktedi. Sondaı-aq, kóktemgi dala jumystary men egin egýge qatysatyn aýyl sharýashylyǵy tehnıkalarynyń daıyndyǵyn, qajetti tuqymmen, mıneraldy tyńaıtqyshtarmen, janar-jaǵarmaımen qamtamasyz etý, sý alý naýqanyna deıin sý tartatyn nasos qondyrǵylaryn alý jumystaryn pysyqtaýdy tapsyrdy.
Taǵy bir mindet – BAQ áleýetin kóterý. Óńir basshysy osy salaǵa jetekshilik etetin orynbasary Qaırat Nurtaıǵa jýrnalıster arqyly óńir tarapynan salalyq mınıstrlikke BAQ týraly Zańǵa ózgeris engizýge usynys joldaýdy tapsyrdy. Sondaı-aq, oblystaǵy azamattyq qoǵamdy damytý úshin júıeli jáne keshendi jumys josparyn ázirlep, memlekettik etnosaıasatty jetildirý maqsatynda qoǵamdyq qurlymdardyń qyzmetin ózektendirýdi júktedi.
Jıynda oblystyq máslıhat hatshysy Naýryzbaı Baıqadamov jergilikti máslıhattardyń rólin kúsheıtý, qoǵam ishinde saıası mádenıettiń qalyptasýyna negiz bolatyn sarapshylyq kózqarastaǵy azamattarmen birlesken sharalardy iske asyrýdyń ózekti ekenine toqtaldy.
Al, oblystyq máslıhat depýtaty, «Syr medıa» JShS Bas dırektory Amanjol Ońǵarbaev BAQ-tyń básekege qabilettiligin arttyrýda jýrnalıst mártebesin kóterý, medıaónimderdiń sapalyq quramyna taldaý jasaý jumystaryn jetildirý baǵytynda usynysyn ortaǵa saldy.
Sondaı-aq, «Dalatex» JShS dırektory, meenat Dinmuhamed Abızov memleket pen bıznes, memleket pen halyq arasynda konstrýktıvti dıalog ornatýdyń ońtaıly ádisterine kóńil bólýdiń qajettiligin qaperge saldy. Al, nemis etnomádenı birlestiginiń belsendisi Svetlana Krıýger óńir damýyna tyń serpin beretin bastamalardy birlikpen atqarýǵa árbir azamattyń belsendiligi kerek ekendigin tilge tıek etti. Qorqyt Ata atyndaǵy Qyzylorda ýnıversıtetiniń prorektory Jandos Bazartaı jastar úshin naqty iske negizdelgen jobalardy elmen etene aralasýǵa sep bolatyn alańdarda talqylaýdyń mańyzy zor ekenin jetkizdi.
Aktıv otyrysynyń sońynda Gúlshara Ábdiqalyqova Joldaýda júktegen mindetterdi sarapshylyq ortada talqylap, syndarly dıalog ornatýǵa shaqyrdy. Sondaı-aq, Prezıdent tapsyrmalaryn sapaly ári nátıjeli júzege asyrýda árbir azamattyń jaýapkershiligi Jańa Qazaqstannyń jańǵyrýǵa jol ashatynyn eske saldy.
"Adyrna" ulttyq portaly
