Bügın «Öner ortalyǧynda» «Qazaqstan Ūlttyq Urban Forumy 2025 – Qyzylorda» halyqaralyq forumynyŋ aşylu räsımı öttı.
Halyqaralyq forumǧa QR Ekologiia jäne tabiǧi resurstar ministrı Erlan Nysanbaev, QR Syrtqy ıster ministrınıŋ bırınşı orynbasary Aqan Rahmetullin, QR Önerkäsıp jäne qūrylys ministrlıgı ökılderı, QR Parlamentı Senaty men Mäjılısınıŋ deputattary, Qazaqstandaǧy Bırıkken Ūlttar Ūiymynyŋ tūraqty üilestıruşısı Sarango Radnaragcha, Bırıkken Ūlttar Ūiymynyŋ UN-Habitat Ūiymy, Bırıkken Ūlttar Ūiymynyŋ Qazaqstandaǧy ökılderı, elımızdıŋ barlyq öŋırınen kelgen oblys äkımınıŋ orynbasarlary, basqarma basşylary qatysty.
Aimaq basşysy Nūrlybek Nälıbaev forumǧa qatysuşylarǧa sättılık tılep, aimaqta atqarylǧan auqymdy jūmystardy atap öttı.
«Prezidentımız Qasym-Jomart Kemelūly «Qazaqstan ornyqty urbanizasiia ürdısımen kele jatyr. Tūrǧyn sany millionnan asatyn qalalar elımızdıŋ jahandyq bäsekelestık qabıletınıŋ tıregı, al oblys ortalyqtary öz öŋırlerı ösımınıŋ özegı boluǧa tiıs», – degen bolatyn.
Bügıngı urbanizasiia däuırınde qalalardy tūraqty damytuda ekologiialyq tepe-teŋdıktı saqtau, tūrǧyndardyŋ ömır süru sapasyn arttyru – basty mındetterdıŋ bırı. Qyzylorda – dästürlı agrarly aimaq! Qyzylorda – megapolis bolmaǧanymen, qarqyndy urbanizasiia jolyna tüsken, öz deŋgeiınde qalalyq infraqūrylym men ömır süru sapasyn arttyru, ekonomikany ärtaraptandyru baǧytynda naqty qadam jasaǧan qala. Qala halqynyŋ ülesı ösıp, öŋır tūrǧyndarynyŋ şamamen 50%-ǧa juyǧy oblys ortalyǧynda tūrady.
Qyzylorda oblysy Prezidentımızdıŋ, Ükımettıŋ erekşe qoldauymen tūraqty damu maqsattaryna säikes keletın, naqty strategiialarǧa, aimaǧymyzdyŋ zamanaui kelbetın qalyptastyruǧa baǧyttalǧan jüielı jūmys jürgızıp keledı. Qazırgı taŋda oblys biudjetı 750 mlrd. teŋgeden asty. Būl qarajat aimaqtaǧy eŋ özektı degen mäselelerdı şeşuge, tūrǧyndardyŋ ömır süru sapasyn jaqsartuǧa, auqymdy infraqūrylymdyq jobalardy ıske asyruǧa baǧyttaluda.
Memleket basşysynyŋ qoldauymen Qyzylorda qalasynda 215 mlrd. teŋgege quattylyǧy 240 MVt jaŋa jylu-elektr ortalyǧy salynuda. İnvestor «Aksa Enerdji» türık kompaniiasy 135 mlrd. teŋgeden astam investisiia qūiyp, qūrylystyŋ 80%-y aiaqtaldy. Ortalyq qyrküiek aiynda paidalanuǧa berıledı.
Sonymen qatar, Katarmen ükımetaralyq kelısım negızınde oŋtüstık öŋırlerde elektr energiiasynyŋ tapşylyǧyn boldyrmau maqsatynda quattylyǧy 1100 MVt, qūny 892 mlrd. teŋge bolatyn bu-gaz qondyrǧysy salynady. Būl megajoba 2028 jyly tolyǧymen ıske qosylady.
Bügıngı forum – qalalardy tūrǧyndarǧa qolaily, klimatqa tözımdı, inkliuzivtı ortalyqtarǧa ainaldyru jolyndaǧy bırlesken bastamalarymyzdy nyǧaitatyn alaŋ. Bız üşın forum – tek talqylau emes, naqty ärıptestıkke bastaityn jol. Osy jūmystardy odan ärı jetıldıruge serpın berıp, qalalardyŋ bolaşaǧyn qalyptastyru jolyndaǧy ortaq maqsattarǧa jetude maŋyzdy qadamdar jasauǧa yqpal etedı dep senemız»,– dedı N.Nälıbaev.
Forumda QR Ekologiia jäne tabiǧi resurstar ministrı Erlan Nysanbaev, QR Syrtqy ıster ministrınıŋ bırınşı orynbasary Aqan Rahmetullin, QR Öŋırlık damu ministrlıgı Qūrylys jäne tūrǧyn üi-kommunaldyq şaruaşylyq ısterı komitetınıŋ töraǧasy Bauyrjan Jünısbekov, Qazaqstandaǧy Bırıkken Ūlttar Ūiymynyŋ Tūraqty üilestıruşısı Sarango Radnaragcha, UN-Habitat ūiymy atqaruşy direktorynyŋ orynbasary Rafael Tuts, BŪŪ DB Qazaqstandaǧy tūraqty ökılınıŋ orynbasary Suhrob Hodjimitov söz söiledı.
Sonymen qatar, UN-Habitat atqaruşy direktory Anaklaudiia Rossbahtyŋ beinehabarlamasy körsetıldı.
