قر پرەزيدەنتى قاسىم-جومارت توقاەۆ 16 ناۋرىزداعى جولداۋىندا قاڭتار ايىندا «توڭكەرىس جاساۋعا ۇمتىلعانداردىڭ اراسىندا بەلگىلى ادامدار بولعانىن، جوعارى لاۋازىم يەلەرى مەملەكەتكە ساتقىندىق جاساعانىن» ايتتى. بىراق باستى ۇيىمداستىرۋشىنىڭ ەسىمى ءالى اتالعان جوق. بەلگىلى قوعام قايراتكەرى سەيداحمەت قۇتتىقادام مەن ءماجىلىس دەپۋتاتى بەرىك ابدىعاليۇلى ءىستىڭ باسىندا تۇڭعىش پرەزيدەنت تۇر دەگەن بولجامعا كوبىرەك سەنەتىندەرىن العا تارتادى. بۇل تۋرالى ولار Qasqa Jol Youtube ارناسىنداعى پودكاستتا پىكىر ءبىلدىردى.
«ەلدىڭ جاعدايىن بىلەمىز. قاۋىپسىزدىك كەڭەسى كىمگە باعىنعانىن بىلەمىز. نە سەبەپتى جاعدايدىڭ ورىن العانى بەلگىلى. قالاي بولعاندا دا ءىستىڭ ءبارى سول كىسىگە (نۇرسۇلتان نازارباەۆقا) بارىپ تىرەلىپ تۇر. مەنىڭ ويىمشا، ونىڭ توڭىرەگىندەگىلەردىڭ ءبارىن تازارتادى. ار جاعىندا ۇلكەن ماسەلە تۋىندايدى. بۇرىنعى پرەزيدەنتكە قالاي باعا بەرەمىز دەگەن ماسەلە شىعادى. مەنىڭ ويىمشا وسىعان توقاەۆ جاۋاپ بەرۋى كەرەك»، - دەيدى ساياساتكەر.
ءماجىلىس دەپۋتاتى بەرىك ابدىعاليۇلى دا بۇعان سەنگىسى كەلەتىنىن، الايدا تەرگەۋ ناتيجەسىن كۇتۋ قاجەتتىگىن ايتتى.
«قازىر تەرگەۋ جۇمىستارى ءجۇرىپ جاتىر. كىم ۇيىمداستىرعانى انىقتالىپ، ءالى ايتىلادى. ارينە، ساياسي جاعى ءبارىبىر سول كىسىگە تىرەلىپ تۇر. بىراق ءبىز قۇقىقتىق مەملەكەت بولعاندىقتان، شەشىمدەر زاڭ اياسىندا قابىلدانۋى كەرەك. ەگەر دالەلدەسەك، ولاردىڭ اكەتكەن اقشالارىن قايتارا الامىز. دالەلدەي الماساق، اقشانى قايتارۋعا ەشكىم رۇقسات بەرمەيدى. حالىقارالىق تۇرعىدا ەشكىم ساناسپايدى. ارينە، باستى ماقسات – كىنالىلەردى قاماپ، ادىلەتتى شەشىم قابىلداۋ. سونىمەن قاتار قازاقستاننان كەتكەن ميلليارداعان قارجىنى قايتارۋ كەرەك.
سوندىقتان بۇگىن ۇلكەن جۇمىستار ءجۇرىپ جاتىر. پرەزيدەنت ەكى اي ۋاقىت بەردى»، - دەدى ب. ابدىعاليۇلى.
باعدارلامانى تومەندەگى سىلتەمە ارقىلى تولىق كورە الاسىز:
