استانا مەن الماتى اراسىنداعى 1200 شاقىرىمدىق جولدىڭ جىرى ازىرگە بىتەتىن ءتۇرى كورىنبەيدى. ازىرگە 500 شاقىرىمعا جۋىق جول عانا جاسالعان. ونىڭ ءوزى 5 جىلعا سوزىلعان. ەندى قالعان 700 شاقىرىمدى اياقتاۋ ءۇشىن 7 جىل كەرەك پە؟
ناشار جولدا جول اپاتى ءجيى بولادى. وعان كىم كىنالى بولماق؟
ۇشاققا دا، پويىزعا دا بيلەت تاپپاي استانادان الماتىعا تاكسيمەن قايتتىم. 15 ساعاتتاي جول جۇردىك. دۇرىس جول بولعاندا نەبارى 10 ساعاتتا جەتۋگە بولادى ەكەن. ايدار ەسىمدى تاكسيست ەكى-ءۇش اي سايىن كولىكتىڭ “حودوۆكا” جاقتارىن اۋىستىرىپ تۇرۋعا ءماجبۇر ەكەنىن جەتكىزدى. ناشار جول قاراپايىم تاكسيستەرگە دە سالماق.
“بىردە شەتەلدىك قوناقتى الىپ ءجۇردىم، ول “ۇلكەن ەكى قالانىڭ ورتاسىن جالعايتىن ءجونى ءتۇزۋ جولدىڭ بولماۋى مۇمكىن ەمەس” دەپ سەنبەدى. اۋدارماشى ارقىلى بىزدە باسقا جولدىڭ جوق ەكەنىن ايتىپ ارەڭ دەگەندە سەندىردىم” دەيدى تاكسيست اعا. ءيا، ءبىز ءۇشىن قالىپتى دۇنيە سياقتى كورىنگەن جاعداي سىرت كوزگە وعاشتاۋ، ساناعا قابىلداۋعا جات ەكەنى بىردەن اڭعارىلادى.
ۇزاق جولدان شاڭ-توپالان، باتپاق بولىپ جەتكەن تاكسيستەردىڭ كولىكتەرىن قالاعا كىرەبەرىستە پوليتسيالار ۇستاپ، لاس بولعانى ءۇشىن دەپ تاعى ايىپپۇل سالادى ەكەن.
جولدىڭ قيىندىعى، جۇمىستىڭ اۋىرلىعى ازداي پوليتسيادان تاعى دا زارداپ شەگەتىن جۇرگىزۋشىلەردى شىن اياپ كەتتىم.
