الماتى قالاسىندا ەكى كۇن قاتارىنان جاستاردىڭ باسىن قوسقان شارالار ءوتتى. 18-ناۋرىز كۇنى الماتى ارەنادا 15 مىڭ جاستىڭ قاتىسۋىمەن كونتسەرت ۇيىمداستىرىلسا، 19-ناۋرىز كۇنى الماتىدا 2 مىڭ جاستىڭ قاتىسۋىمەن پرەزيدەنتتىڭ باعىتىن قولداۋ اكتسياسى ۇيىمداستىرىلدى. الماتى اكىمدىگىنىڭ بۇل شاراسىن جوعارى باعالاپ جاتقان جاندار سانى كوپ ەمەس. ونى الەۋمەتتىك جەلىدەگى پىكىرلەردەن كورسەك بولادى.
مىسالى فەيسبۋك جەلىسىنىڭ قولدانۋشىسى ورازاي قىدىرباەۆ بىلاي دەپي جازىپتى: "تۇسىنگەنىم بويىنشا، كەشە الماتى ارەنادا پرەزيدەنت توقاەۆتى قولدايتىن ساياسي كونتسەرت وتكەن. ول كونتسەرتكە مىڭداعان جاس ءوز ەركىمەن كەلىپ قاتىسقان. الايدا ولاردىڭ كوبى كونتسەرتتىڭ ساياسي سيپاتتا وتەتىنىن بىلمەگەن: سۇيىكتى تانىمال انشىلەر تەگىن ونەر كورسەتەتىنىن ەستىپ، قۋانا بارعان. سوڭىندا ۇيىمداستىرۋشىلار جاستاردى ماسسوۆكا رەتىندە پايدالانىپ كەتكەن.
بيىل بىرنەشە بەيبىت جيىنعا قاتىسقان ادام رەتىندە مىنانى ايتا الامىن: ازاماتتار ءوز قالاۋىمەن كەلىپ قاتىسقان ميتيڭدە كومپيۋتەرگە تەرىپ باسىلعان بىركەلكى پلاكاتتار بولمايدى. الاڭعا ءوز قالاۋىمەن، ءوز پوزيتسياسىن اشىق بىلدىرۋگە كەلگەن تۇلعالار فوتوعا تۇسىرگەن كەزدە ءجۇزىن جاسىرمايدى، كەرىسىنشە، ءوزىن ماقتانا كورسەتەدى!ەڭ جامانى نە، بىلەسىز بە؟
قازىردىڭ وزىندە كەشەگى كونتسەرت پەن بۇگىنگى ءميتيڭدىڭ فوتولارى پوەزيدەنتكە جەتىپ بارعان شىعار. ارينە، وعان جاستاردىڭ تانىمال انشىلەردى تىڭداۋ ءۇشىن بارعانى، ۋنيۆەرسيتەت تاپسىرما بەرگەنى ءۇشىن ميتيڭگە قاتىسقانى ايتىلمايدى. وسىنشاما جاستىڭ ونى قولدايتىنى عانا ايتىلادى. سوسىن ارادان جىلدار وتكەندە، ءوزىن مۇنداي ىستىق ىقىلاسپەن جاقسى كورگەن حالقى قالاي عانا وعان ورناتىلعان ەسكەرتكىشتى قيراتىپ تاستاعانىن تۇسىنە الماي الەك بولادى", - دەپتى.
(سۋرەت almaty.tv سايتىنان الىندى)
ال ساياساتتانۋشى شالقار نۇرسەيىتوۆ بولسا ءوز ويىن بىلاي تىزبەكتەيدى: "توي-ميتينگىدەن مىناداي وپتيميست ويمەن قايتتىم: الداعى پرەزيدەنت جانە پارلامەنت سايلاۋلارىندا ەلەكتوراتتىڭ قولداۋىنان جۇرداي “امانات” تاس-تالقان بولىپ جەڭىلەدى. ول ءۇشىن ازاماتتىق قوعام بولىپ سايلاۋلاردىڭ ءادىل ءارى اشىق وتۋىنە قول جەتكىزۋىمىز كەرەك. ويتكەنى قازاقستان جاڭا ەسكى نۇروتاندىقتاردىڭ عانا وتانى ەمەس".
(سۋرەت almaty.tv سايتىنان الىندى)
جۋرناليست رۋسلان مەدەلبەك بولسا بىلاي دەيدى: "باعلان دەگەن ءانشى كەشەگى جاستاردىڭ جاڭا قازاقستاندى قولداۋ داڭعازاسىندا "باقىتتى ەلمىز، پرەزيدەنتىمىز بەس ءتىل بىلەدى" دەيدى... بەس-التى جاس ء"بىزدىڭ پرەزيدەنت بەس ءتىل بىلەدى؟ سەنىڭ پرەزيدەنتىڭ شە؟" دەگەن پلاكاتپەن ءجۇر.
باقىتتى ەل پرەزيدەنتتىڭ بەس ءتىل بىلگەنىمەن ولشەنبەسە كەرەك. بەس ءتىل بىلمەي-اق ەلىن باقىتتى ەتكەن، باي ەتكەن ەلدەردى بىلەمىز. باقىتتىڭ ولشەمىن بۇكىل ەلگە تانباۋ كەرەك. باقىتتى ەلدەن جاستار كەتپەسە كەرەك، باقىتتى ەلدە كوررۋپتسيا، تانىس ارقىلى ءوسۋ بولماسا كەرەك. باقىتتى ەلدە ءار جاس بولاشاعىنا سەنسە كەرەك. باقىتتا ەلدە قىسىلتاياڭ شاقتا داڭعازاعا ءبىر تيىن دا شاشپاسا كەرەك...
باقىت دەگەن سۋسىمالى ۇعىم عوي، بىراق باقىت دەگەندى بيلىك يا حالىقتىڭ قالتاسىنان وزىنە باقىت زوناسىن قۇرىپ العان انشىسىماقتار ەمەس اۋىلدا سۋعا، جارىققا، ءتۇزۋ جولعا قولى جەتپەي وتىرعان قاراپايىم حالىق، تۇرمەدە ازاپتالعان، بالام ازاپتالدى دەپ شىرىلداعان انا، الەۋمەتتىك ليفت كورمەي جۇرگەن جاستار دا سەزىنۋى ءتيىس".
(سۋرەت الەۋمەتتىك جەلىدەن الىندى)
الەۋمەتتىك جەلى قولدانۋشىلارى الماتى اكىمدىگىنىڭ جاستاردى جيناپ، وتكىزگەن شاراسىن وسىلايشا ءتۇرلى سىننىڭ استىنا الۋدا. ولار شاراعا اكىمدىكتىڭ تىكەلەي قاتىسى بارىن، مۇنداي حالىقتى بيلىكتىڭ رۇقساتىنسىز وتكىزبەيتىنىن دە ايتۋدا. باسىم كوپشىلىگى "جاڭا قازاقستاندى ەسكى ادىسپەن قۇرۋ مۇمكىن ەمەس" دەپ وي تۇيۋدە.
"ادىرنا" ۇلتتىق پورتالى
