ەلىمىزدەگى ەڭ ماڭىزدى ماسەلە اۋدانداردى دامىتۋ مەن حالىققا جۇمىس بەرۋ ماسەلەسى. بۇل وتە ماڭىزدى، سەبەبى سوڭعى ۋاقىتتا ۋربانيزاتسيا پروتسەسى ۇدەپ، قالاعا كوشكەن ادام سانى ارتۋدا. ونى رەتتەۋدىڭ ءبىر جولى اۋدانداردا زاۋىت، فابريكا جانە ونەركاسىپ كەشەندەرىن اشۋ. بۇل مىندەتتى جاركەنت قالاسىنداعى "جاركەنت كراحمال-سىرنە زاۋىتى" مەن "ۋنيۆەرسال" زاۋىتى ءساتتى جۇزەگە اسىرىپ كەلەدى.
"جاركەنت كراحمال-سىرنە زاۋىتى" 2013 جىلى 20-جەلتوقساندا اشىلدى. زاۋىتتا جۇگەرىدەن 18 ءتۇرلى ءونىم جاسالادى. ونىڭ ىشىندە سيروپتار، كراحمال، گليۋتەن جانە باسقا ءونىم تۇرلەرى جاسالىپ، ەكسپورت جانە يمپورتقا شىعارىلادى. ساتىپ الۋشى مەملەكەتتەر قاتارىنا رەسەي، وزبەكستان جانە قىرعىزستان جاتادى. ال ىشكى نارىقتا كونديتەرلىك فابريكالاردان باستاپ فارماتسەۆتيكالىق كومپانيالارعا دەيىن تاپسىرىس بەرەدى. زاۋىت 80 پايىز اۆتوماتتاندىرىلعان جۇيەدە جۇمىس ىستەيدى. زاماناۋي قۇرىلعىلار مەن قاجەتتى قۇرال-جابدىقتار ساتىپ الىنعان. زاۋىت باسشىلىعى ۇنەمى مودەرنيزاتسيالاۋ پروتسەسىن جۇرگىزۋدى قولدايدى، سول سەبەپتى دە زاۋىتتا جىل سايىن جاڭاشىلدىق ەنگىزىلۋدە دەسەك تە بولادى. مىسالى زاۋىت سۋدى ۇنەمدەۋ ماقساتىندا فيلتر جۇيەسىن ورناتقان. بۇل پايدالانىلعان سۋدى قايتا تازارتىپ، 70 پايىزىن وندىرىسكە ەكىنشى مارتە قولدانۋعا مۇمكىندىك بەرەدى.
زاۋىتتىڭ پانفيلوۆ اۋدانىندا ورنالاسقانى دا تەگىن ەمەس. اۋدان كسرو كەزەڭىندە جۇگەرى ءونىمىن شىعارۋ بويىنشا كوشباسشى سانالعان، ال قازىر سول داڭقتى كەزەڭدى قايتا قالپىنا كەلتىردى. زاۋىتقا جۇگەرى ونىمدەرىن پانفيلوۆ اۋدانى، ىلە اۋدانى، ەڭبەكشىقازاق اۋدانى جانە ۇيعىر اۋدانىنىڭ شارۋالارى وتكىزەدى. وسى ارقىلى زاۋىت ءتورت بىردەي اۋدان حالقىنا جۇمىس بەرىپ وتىر دەۋگە تولىق نەگىز بار. ماۋسىمدىق كەزەڭدە، ياعني جۇگەرىنى جيناۋ مەن تاسىمالداۋ مەزگىلىندە جۇمىسشىلار سانى ارتادى.
زاۋىت جۇمىسشىلارىنا جالاقىنى ۋاقىتىلى تولەيدى. سونىمەن قاتار جەتكىزۋ جانە تاماقتاندىرۋ دا تەگىن. ول ءۇشىن ارنايى اسحانا مەن جەتكىزۋگە ارنالعان اۆتوبۋستارى بار. جۇمىسشىلاردىڭ كيىمىن تازا ۇستاۋ ماقساتىندا كيىم جۋ بولىمشەسى اشىلعان. زاۋىت قىزمەتكەرلەرىنىڭ بىلىكتىلىگىن ارتتىرۋ ماقساتىندا ارنايى وقىتۋ ورتالىعى دا اشىلعان. وندا جۇمىسپەن قامتۋ باعدارلاماسى بويىنشا جاستار جانە بىلىكتىلىگىن ارتتىرۋ بويىنشا زاۋىت قىزمەتكەرلەرى جۇمىس ىستەيدى.
"جاركەنت كراحمال-سىرنە زاۋىتىنىڭ" جانىندا ءۇش تسەحتەن تۇراتىن "ۋنيۆەرسال" زاۋىتى ورنالاسقان. الىپ زاۋىتتىڭ نەگىزگى قىزمەتى قاپتار شىعارۋ. ءۇن، قانت جانە تاعى باسقا ونىمدەردى تاسىمالداۋعا ارنالعان قاپتار تىنىمسىز ستانوكتاردان شىعىپ جاتىر، شىعىپ جاتىر. ايىنا 50 ملن قاپ شىعارامىز دەيدى زاۋىت قىزمەتكەرلەرى. زاۋىتتا 500 جۇمىسشى بار جانە ورتاشا ايلىق 180 مىڭ تەڭگە. بۇل اۋدان ءۇشىن وتە جاقسى كورسەتكىش بولىپ سانالادى.
زاۋىتتا تسەح باسشىسى بولىپ قىزمەت اتقاراتىن جادىرا امانگەلدىقىزى: "ۋنيۆەرسال زاۋىتىندا سەگىز جىلدان بەرى قىزمەت اتقارىپ كەلەمىن. بىزدە ءجىپ وندىرەتىن، قاپ شىعاراتىن جانە ۇلكەن قانار قاپتارىن شىعاراتىن، تىگىن تسەحتەرىمىز بار. جۇمىسشىلارىمىز ەكى كۇن كۇندىز، ەكى كۇن تۇندە جانە ەكى كۇن دەمالىس رەجيمى بويىنشا جۇمىس ىستەيدى. جۇمىس زاڭ تالاپتارىنا ساي سەگىز ساعاتتان تۇرادى، سوندىقتان جۇمىس گرافيگى اۋىر ەمەس. ونىڭ ۇستىنە جەتكىزۋ جانە تاماقتاندىرۋ جۇيەلەرى بار. ايلىعىمىزدى ۋاقىتىلى الامىز، ارنايى سىياقىلار دا ءجيى بەرىلەدى. زاۋىت ۇجىمى دوستىق، تاتۋلىق جانە ۇيىمشىلدىقتى تۋ ەتىپ، قىزمەت ەتۋدە", - دەدى.
زاۋىت باسشىلىعى الەۋمەتتىك جاۋاپكەرشىلىكتى جوعارى قويادى. زاۋىت باسشىسى قازاقستان حالقى اسسامبلەياسىنىڭ توراعاسىنىڭ ورىنباسارى، الماتى وبلىسى ماسليحاتىنىڭ دەپۋتاتى زاكىرجان كۋزيەۆ باستاماسىمەن 13 مەشىت الماتى وبلىسى بويىنشا بوي كوتەرگەن. ونىڭ ءبىرى جاركەنت ورتالىق مەشىتى.
سونىمەن بىرگە قيىن جاعدايعا تاپ بولعان جانە الەۋمەتتىك قولداۋعا ءزارۋ وتباسىلارىنا دا كومەك قولىن سوزىپ كەلەدى. جاركەنت قالاسى بويىنشا ەكى وتباسىعا ءۇي سالىپ، باقىت سىيلاپتى. باسشىلىق قايىرىمدىلىق جاساۋ مەن قوعام الدىنداعى الەۋمەتتىك جاۋاپكەرشىلىكتى جوعارى سەزىنۋدى ماڭىزدى دەپ سانايدى.
"ادىرنا" ۇلتتىق پورتالى
