ۋكراينا پرەزيدەنتى ۆلاديمير زەلەنسكي الەۋمەتتىك جەلىلەردەگى پاراقشاسىندا ۋكراينالىق ساياساتكەر ءارى وليگارح، "وپپوزيتسيالىق پلاتفورما - ءومىر ءۇشىن" پارتياسىنىڭ جەتەكشىسى ۆيكتور مەدۆەدچۋك ۇستالعانىن مالىمدەدى. ونى ء"پۋتيننىڭ وكىل اكەسى" دەپ تە اتايدى، - دەپ حابارلايدى “ادىرنا” ۇلتتىق پورتالى Tengrinews.kz سايتىنا سىلتەمە جاساپ.
سەيسەنبى كەشىندە ۋكراينا باسشىسى حالىق دەپۋتاتىنىڭ اسكەري فورمادا، قولى كىسەندەلگەن سۋرەتىن جاريالادى.
"ۋكراينانىڭ قاۋىپسىزدىك قىزمەتى ارقاسىندا ارنايى وپەراتسيا جاسالدى. جارايسىڭدار! تولىعىراق جاقىندا بەلگىلى بولادى. ۋكراينا العا!"- دەپ جازدى زەلەنسكي.
قاۋىپسىزدىك قىزمەتىنىڭ ءباسپاسوز قىزمەتى ۇستالعان ەر ادامنىڭ تاعى ءبىر سۋرەتىن جاريالاپ، مەدۆەدچۋك زەلەنسكيدىڭ تاپسىرماسىمەن ۇستالعانىن حابارلادى.
"بىردە-ءبىر ساتقىن جازاسىز قالمايدى جانە ول ءۇشىن ۋكراينا زاڭىنا سايكەس جاۋاپ بەرەدى", - دەيدى يۆان باكانوۆا.
كەيىنىرەك زەلەنسكي ۆيدەوۇندەۋ جاساپ، مەدۆەدچۋكتى ورىس تۇتقىنىنا تۇسكەن ۋكراينالىقتارعا اۋىستىرۋدى ۇسىندى.
"مەدۆەدچۋك مىرزا كوسموناۆتيكا كۇنى ۇستالعانى وتە قىزىق بولدى. ول 48 كۇن بويى جاسىرىنىپ ءجۇرىپ، اقىرى ءبىزدىڭ مەملەكەتتەن قاشۋدى ۇيعاردى. اسكەري كامۋفلياج كيىپ ءوزىن جاسىرىپ قالعىسى كەلگەن (...)", - دەيدى زەلەنسكي.
كرەمل زەلەنسكيدىڭ بۇل مالىمدەمەسىنە بىلاي جاۋاپ بەردى:
"مەدۆەدچۋك تۋرالى اقپاراتتى كوردىم. مەن مۇنىڭ قانشالىقتى شىندىق ەكەنىن ايتا المايمىن، ءبىر نارسە ايتۋ دۇرىس بولماس ەدى", - دەدى رەسەي پرەزيدەنتىنىڭ ءباسپاسوز حاتشىسى دميتري پەسكوۆ.
ونىڭ سوزىنشە، جالعان اقپارات وتە كوپ، سوندىقتان ءبارىن تەكسەرۋ كەرەك.
ۆيكتور مەدۆەدچۋك ءپۋتيننىڭ ۋكرايناداعى ەڭ جاقىن جانە ىقپالدى وداقتاسى بولىپ سانالادى. 2021 جىلدىڭ مامىرىنان باستاپ ول مەملەكەتتىك اۋىستىرۋ جانە ۇلتتىق رەسۋرستاردى توناۋعا ارەكەت جاسادى دەگەن كۇدىكپەن ءۇي قاماقتا بولعان. 27 اقپاندا ساياساتكەر قاشىپ كەتكەنى بەلگىلى بولدى. ونى ىزدەستىرۋمەن ۋكراينا قاۋىپسىزدىك قىزمەتى ارنايى توبى اينالىستى.
“ادىرنا” ۇلتتىق پورتالى
