ءماجىلىس دەپۋتاتى ازات پەرۋاشەۆ بيۋدجەتتەن قاجەتسىز شىعىندار كەتىپ جاتقانىن مالىمدەدى، دەپ حابارلايدى “ادىرنا” ۇلتتىق پورتالى.
«بيۋدجەتتىڭ ءتيىمسىز شىعىندارىن قىسقارتۋ. قازىردىڭ وزىندە قاڭتار وقيعاسىنان ەشنارسە ۇيرەنبەگەن شەنەۋنىكتەردىڭ ەسكى امالدارى مەن ەسكى تابەتىن ءجيى كورەمىز. ماسەلەن، ميالى اۋىلىندا 2 اۆتوكولىككە ارنالعان ءورت ءسوندىرۋ دەپوسىنىڭ قۇرىلىسىنا 584 ملن تەڭگە جوسپارلانعان، ياعني ءبىر ميلليون ءۇش ءجۇز مىڭ دوللار. ميلليون دوللارعا ەكى كولىككە ارنالعان بوكس ەمەس، جارتى اۋىل ساتىپ الۋعا بولادى. وسى ماسەلەلەردى فراكتسيادا تالقىلاعان كەزدە اۋداندىق ءماسليحات دەپۋتاتتارىنىڭ ءبىرى ونىڭ ورنىنا 100 ملن قوسىپ، ءۇش اۋىسىمنىڭ ورنىنا تولىققاندى اۋىل مەكتەبىن سالۋعا بولاتىنىن ايتقان ەدى. بىراق شىعىندى نەگىزدەۋدى سۇراعان كەزدە بارلىعى «جوبالىق-سمەتالىق قۇجاتتامادا كەلىسىلگەن، ساراپتاما دا ماقۇلدانعان» دەپ جاۋاپ بەرەدى. بۇل بايلامنىڭ قالاي جۇمىس ىستەيتىنىن ءبارى بۇرىننان بىلەدى: تاپسىرىس بەرۋشى – جوبالاۋشى-مەردىگەر، ولاردىڭ ارقايسىسى جوبانىڭ قۇنىن «كوبەيتۋگە» مۇددەلى»، – دەيدى ول.
پەرۋاشەۆتىڭ ايتۋىنشا، ەل بيۋدجەتىندە كۇمان تۋدىراتىن شىعىندار كوپ.
«ياعني، ءبىز ءوز بالالارىمىزعا قاراعاندا لەگيونەرلەرگە 80 ەسە كوپ اقشا بولەمىز. تاعى ءبىر ماسەلە، مينيسترلىكتەردىڭ كوبىسى ءارتۇرلى زەرتتەۋلەر مەن كەڭەس بەرۋ شىعىندارىنان باس تارتادى. بۇل دۇرىس، سەبەبى سالاداعى جاعدايدى تالداۋ جانە ءتۇسىنۋ مينيسترلىكتەر مەن ولاردىڭ قىزمەتكەرلەرىنىڭ تىكەلەي مىندەتتەرىنە كىرەدى. الايدا تسيفرلىق دامۋ مينيسترلىگى كەنەتتەن كونسالتينگكە 953 ميلليون تەڭگە، ال ۇلتتىق ەكونوميكا مينيسترلىگى جالپى 1,5 ميلليارد جۇمساۋ تۋرالى شەشىم قابىلدادى»، - دەيدى پەرۋاشەۆ.
