تۇركىمەنستان بيلىگى جاڭا پرەزيدەنت سەردار بەردىمۇحامەدوۆتەن جاڭا كۋلت جاساۋعا بارىنشا تىرىسىپ جاتىر. ماسەلەن، بالقان ءۋالاياتىندا مەملەكەت باسشىسىنا ارنالعان ودا ولەڭدەرگە بايقاۋ جاريالاندى. جەڭىمپازدارعا ۇلكەن سىيلىق بەرىلەدى دەپ ۋادە ەتىپ وتىر، دەيدى ازاتلىك راديوسىنىڭ باتىس وڭىرىندەگى ءتىلشىسى.
بۇل جايىندا تىلشىگە حابارلاعان بيۋدجەتتىك مەكەمە قىزمەتكەرى جەرگىلىكتى ءبىلىم جانە مادەنيەت باسقارماسى ۇيىمداستىرىپ وتىرعانىن ايتقان.
"جەرگىلىكتى بيلىك ءۋالايات اقىندارىنا ءۇمىت ارتىپ وتىر. ولار ۇناعان ولەڭگە ءان جازىپ، رەسپۋبليكا دەڭگەيىندە حيت جاساۋعا ۋادە ەتىپ وتىر. وسىلاي پرەزيدەنت الدىندا ءوڭىردىڭ بەدەلىن كوتەرگىسى كەلەدى",- دەيدى اتى-ءجونىن جاسىرعان ءبىلىم سالاسىنىڭ قىزمەتكەرى.
تاياۋدا عانا بۇل وڭىرگە رەسمي ساپارمەن بارعان پرەزيدەنت جاڭا اۋرۋحانانىڭ تۇساۋىن كەسكەن. دەرەككوزدىڭ ايتۋىنشا، سول كەزدە جاڭا باسشىعا ءوزىن قوشەمەتپەن كۇتىپ الۋ دەڭگەيى ۇناماعان كورىنەدى. ەندى جەرگىلىكتى بيلىك سونىڭ ورنىن جابۋ ءۇشىن، پرەزيدەنتتى ماداقتاۋعا ارنالعان جىر بايقاۋىن وتكىزىپ جاتىر.
بيىل تۇركىمەنستاندا ناۋرىز ايىندا كەزەكتەن تىس "پرەزيدەنت سايلاۋى ءوتىپ", گۋربانگۋلى بەردىمۇحامەدوۆ ءوزىنىڭ ورنىن 40 جاستاعى ۇلىنا قالدىرىپ كەتكەن.
“ادىرنا” ۇلتتىق پورتالى
