پرەزيدەنت اكىمشىلىگى باسشىسىنىڭ ورىنباسارى ايدا بالاەۆا ءوز Facebook پاراقشاسىندا بالالارعا ارنالعان الەمدىك دەڭگەيدەگى «TiJi» جانە «Nickelodeon» تەلەارنالارىنىڭ مۋلتفيلمدەرىن قازاقشا اۋدارىلعانى تۋرالى باياندادى، دەپ حابارلايدى “ادىرنا” ۇلتتىق پورتالى.
“بىلتىر الەمدىك بالالار ارنالارىنىڭ ونىمدەرىن قازاقشا سويلەتۋ جوباسىن قولعا العان ەدىك. ناتيجەسىندە «TiJi» جانە «Nickelodeon» تەلەارنالارىمەن ورتاق كەلىسىمگە كەلىپ، بۇگىنگە دەيىن ەكى ارنانىڭ 670 ساعاتقا سياتىن مۋلت ونىمدەرى قازاق تىلىنە اۋدارىلدى.
«TiJi» كانالىندا ءمۋلتفيلمدى مازىردەگى ءتىل تاڭداۋ ارقىلى قازاقشاعا اۋىستىرۋعا بولسا، «Nickelodeon» تەك قازاق تىلىندە حابار تاراتاتىن HD ساپادا بولەك ارنا اشتى.
قازىرگى ينتەرنەت زامانىندا اقپارات كەڭىستىگىنىڭ شەگى جوق. عالامتورداعى مۋلتفيلمدەر بالالاردىڭ ءتىلىن قالىپتاستىراتىن نەگىزگى قۇرالعا اينالىپ ۇلگەردى. قازىر ءوزىمنىڭ دە نەمەرەم بار. سوندىقتان مەن ءۇشىن بۇل ماسەلە اتا-انا رەتىندە دە وتە ماڭىزدى.
ەندى وسى جاسالعان دۇنيەنىڭ پايداعا اسۋىن قامتاماسىز ەتۋ قاجەت. ول ءۇشىن نەگىزگى ءۇمىتتى اتا-اناعا ارتامىز. ارينە، بالاعا ءبىرىنشى كەزەكتە انيماتسيانىڭ مازمۇنى قىزىقتى. مۋلتفيلم كورۋ ارقىلى قاي ءتىلدى بولسىن تەز قابىلدايدى. سوندىقتان بۇل بۇلدىرشىندەرگە قازاق ءتىلىن ۇيرەتۋدىڭ ەڭ ءتيىمدى جولى بولاتىنىنا سەنىمدىمىن.
وسى ورايدا ءبىز ۇلكەندەر بالالارعا قازاق تىلىندەگى مۋلتونىمدەردىڭ بار ەكەنىن ايتىپ، قوسىپ كورسەتۋىمىز قاجەت.
بارلىق اتا-انانى وسى يگىلىكتى ىسكە، ۇيىمشىلدىققا شاقىرامىن! بارلىعى وزىمىزگە بايلانىستى!”،- دەپ جازدى ايدا بالاەۆا.
“ادىرنا” ۇلتتىق پورتالى
