مەكتەپ ءبىتىرۋ كەشىن مەيرامحانادا وتكىزۋگە تىيىم سالىندى، دەپ حابارلايدى “ادىرنا” ۇلتتىق پورتالى.
قر بعم مدوبك تاربيە جۇمىسى جانە قوسىمشا ءبىلىم بەرۋ باسقارماسىنىڭ باسشىسى سامال قادىروۆا:
«جوعارى سىنىپ وقۋشىلارى مەكتەپ ءبىتىرۋ كەشىن اسىعا كۇتەتىنى بەلگىلى، ويتكەنى بۇل جاستاردىڭ جاڭا ومىرگە قادام باسقانىن بىلدىرەدى. سوڭعى ەكى جىلدا كوروناۆيرۋس ىندەتى مەكتەپ پەن ۇستازداردىڭ ءداستۇرلى قوشتاسۋ كەشىن توقتاتىپ تاستادى. بۇگىنگى تاڭدا ەپيدەميالىق جاعداي مۇنداي كەشتى وتكىزۋگە مۇمكىندىك بەرەدى. بىراق كەشتىڭ بارلىعى مىندەتتى تۇردە مەكتەپ قابىرعاسىندا وتكىزىلۋى كەرەك. مەكتەپتەردىڭ قامقورشىلىق كەڭەستەرى مەن ءبىلىم باسقارمالارى تۇلەكتەردىڭ اتا-انالارىنا بۇل شارالارعا شىعىندالۋدىڭ ءتيىمسىز ەكەنى تۋرالى ءتۇسىندىرۋ جۇمىستارىن جۇرگىزۋى قاجەت. بۇل كۇن تارتىبىندەگى باستى ماسەلەلەردىڭ ءبىرى»، – دەدى ول.
مەكتەپ ءبىتىرۋ شارالارىنا مەكتەپتىڭ پەداگوگيكالىق ۇجىمى، تۇلەكتەر، تۇلەكتەردىڭ اتا-انالارى، پەداگوگيكالىق ەڭبەك ارداگەرلەرى، قامقورشىلىق كەڭەس مۇشەلەرى، پاتروناتتىق ۇيىمدار، وبلىستاردىڭ، نۇر-سۇلتان، الماتى جانە شىمكەنت قالالارىنىڭ ءبىلىم باسقارمالارىنىڭ، ءبىلىم بولىمدەرىنىڭ، مۇددەلى مەملەكەتتىك ورگانداردىڭ وكىلدەرى جانە باسقالار قاتىسا الادى.
ءبىلىم جانە عىلىم مينيسترلىگىنىڭ ۇسىنىمدارىنا سايكەس، مەكتەپ ءبىتىرۋ كەشى ءبىلىم بەرۋ ۇيىمىنىڭ ءوز كۇشىمەن ۇيىمداستىرىلۋى كەرەك.
مىناداي ماسەلەلەرگە رۇقسات ەتىلمەيدى:
– انيماتورلاردى، مەرەكەلىك اگەنتتىكتەردى، اقىلى ارتىستەردى، مەرەكەلىك شارالارعا جەكە ستۋديالاردى تارتۋعا;
– مەرەكەلىك داستارحان ۇيىمداستىرۋعا;
– اۆتوكولىكتەردى جالعا الىپ، قالا (اۋدان) بويىنشا ەكسكۋرسيالار وتكىزۋگە;
– مەكتەپ اكىمشىلىگى مەن مۇعالىمدەرگە سىيلىقتار الۋ ءۇشىن قاراجات جيناۋعا;
– ويىن-ساۋىق مەكەمەلەرىندە ءبىتىرۋ كەشتەرىن ۇيىمداستىرۋعا بولمايدى.
”ادىرنا” ۇلتتىق پورتالى
