Mektep bitirý keshin meıramhanada ótkizýge tyıym salyndy, dep habarlaıdy “Adyrna” ulttyq portaly.
QR BǴM MDOBK tárbıe jumysy jáne qosymsha bilim berý basqarmasynyń basshysy Samal Qadyrova:
«Joǵary synyp oqýshylary mektep bitirý keshin asyǵa kútetini belgili, óıtkeni bul jastardyń jańa ómirge qadam basqanyn bildiredi. Sońǵy eki jylda koronavırýs indeti mektep pen ustazdardyń dástúrli qoshtasý keshin toqtatyp tastady. Búgingi tańda epıdemııalyq jaǵdaı mundaı keshti ótkizýge múmkindik beredi. Biraq keshtiń barlyǵy mindetti túrde mektep qabyrǵasynda ótkizilýi kerek. Mektepterdiń qamqorshylyq keńesteri men bilim basqarmalary túlekterdiń ata-analaryna bul sharalarǵa shyǵyndalýdyń tıimsiz ekeni týraly túsindirý jumystaryn júrgizýi qajet. Bul kún tártibindegi basty máselelerdiń biri», – dedi ol.
Mektep bitirý sharalaryna mekteptiń pedagogıkalyq ujymy, túlekter, túlekterdiń ata-analary, pedagogıkalyq eńbek ardagerleri, Qamqorshylyq keńes músheleri, patronattyq uıymdar, oblystardyń, Nur-Sultan, Almaty jáne Shymkent qalalarynyń bilim basqarmalarynyń, bilim bólimderiniń, múddeli memlekettik organdardyń ókilderi jáne basqalar qatysa alady.
Bilim jáne ǵylym mınıstrliginiń usynymdaryna sáıkes, mektep bitirý keshi bilim berý uıymynyń óz kúshimen uıymdastyrylýy kerek.
Mynadaı máselelerge ruqsat etilmeıdi:
– anımatorlardy, merekelik agenttikterdi, aqyly ártisterdi, merekelik sharalarǵa jeke stýdııalardy tartýǵa;
– merekelik dastarhan uıymdastyrýǵa;
– avtokólikterdi jalǵa alyp, qala (aýdan) boıynsha ekskýrsııalar ótkizýge;
– mektep ákimshiligi men muǵalimderge syılyqtar alý úshin qarajat jınaýǵa;
– oıyn-saýyq mekemelerinde bitirý keshterin uıymdastyrýǵa bolmaıdy.
”Adyrna” ulttyq portaly
