قورعانىس ءمينيسترى رۋسلان جاقسىلىقوۆتىڭ سوزدەرى بۇگىندە قوعامدا قىزۋ تالقىعا تۇسۋدە. بىرنەشە كۇن بۇرىن مينيستر جۋرناليستەردىڭ سۇراعىنا جاۋاپ بەرۋ بارىسىندا "نەگە قازاق تىلىندە سۇحبات بەرمەيسىز؟", – دەگەن سۇراققا: "ۆى زناەتە، ۆوت پوسموتريتە: ناش پەرۆىي پرەزيدەنت–ەلباسى گوۆوريل تاك: "كوگدا سوبيرايۋتسيا 100 كازاحوۆ ي سرەدي نيح ودين نە كازاحويازىچنىي، توگدا مى پەرەحوديم نا رۋسسكي يازىك دليا توگو، چتوبى نە وسكوربيت چي-تو چۋۆستۆا. پوەتومۋ كوگدا مى س ۆامي بۋدەم ودين نا ودين رازگوۆاريۆات، تو قازاقشا سويلەيمىز. جاراي ما؟", – دەگەن ەدى.
مينيستر بۇل جاۋابىنا قوعام ءوز نارازىلىعىن ءبىلدىرىپ، "مەملەكەتتىك ءتىلدى بىلمەيتىن ءمينيستردىڭ كەرەگى جوق" دەپ الەۋمەتتىك جەلىگە جازبالار قالدىرىپ جاتتى. مىسالى اقىن، دەپۋتات قازىبەك يسا بىلاي دەپ جازبا قالدىردى. ء"تىلىن قورعاي الماعان مينيستر ەلىن قالاي قورعايدى؟ قورعانىس ءمينيسترى ايتىپ تۇرعان سول مەملەكەتتىك ءتىلىمىزدى بەيشارا جاعدايعا تۇسىرگەن تۇسىنىكتى ەلباسىمەن بىرگە زەينەتكە كەتىرۋ كەرەك ەندى. ال “پاتريوت بولۋ ءۇشىن مەملەكەتتىك ءتىلدى ءبىلۋ مىندەتتى ەمەس!”-دەپ، پارادوكس پيعىلداعى ساۋاتسىز ءسوزى ءۇشىن قورعانىس ءمينيسترى رۋسلان جاقسىلىقوۆتى وزگە ەلدە بولسا، ءبىر كۇن دە ۇستاماس ەدى… بيلىگى ءدۇبارا ەلدە مۇنداي ماسقارا كۇنارا بولا بەرەدى! تەك مەملەكەتتىك ءتىلدى مىندەتتەيتىن زاڭ كەرەك!" ، - دەپ جازدى ول.
قر پارلامەنتى ءماجىلىسىنىڭ دەپۋتاتى، ايتىسكەر اقىن امانجول ءالتاي بولسا مينيسترگە بىلاي دەپ جازبا ارنادى: "رۋسلان فاتيحۇلى، ءسىز قاتارداعى ازاماتتىڭ ءبىرى ەمەس، ارقاسىنا ەل اماناتىن ارقالاعان قورعانىس ءمينيسترىسىز. سوندىقتان دا مەملەكەتتىك تىلگە سالعىرتتىق تانىتپاي، قۇرمەتپەن قاراۋعا ءتيىسسىز.
مەملەكەتتىك تىلدە سويلەۋ ارقىلى ارتىڭىزداعى سان مىڭداعان ساربازدارعا ونەگە كورسەتۋگە مىندەتتى ەكەنىڭىزدى ەستەن شىعارماڭىز. اسكەرىمىزدىڭ جانە ونىڭ كەڭسەسىنىڭ ءتىلى تولىق قازاقشا بولاتىن ۋاقىت جەتتى. ءوزىڭىز ايتقانداي، قىرىق قازاق وتىرىپ ورتاداعى جالعىز وزگە ۇلت وكىلى ءۇشىن ورىس تىلىندە سويلەۋ كەڭەستىك جۇيەدەن قالىپ قويعان وتارلىق سانانىڭ كورىنىسى.
سوندىقتان دا تاۋەلسىز ەلدىڭ قولباسشى گەنەرالى رەتىندە بۇل ماسەلەگە جاڭاشا قاراڭىز. مەن ءسىزدىڭ اسكەري مامان رەتىندە كاسىبي تاجىريبەڭىزگە، اتقارىپ كەلە جاتقان ەڭبەگىڭىزگە قۇرمەتپەن قارايمىن.
وتانىمىزدىڭ اسكەرىن باسقارۋ ءۇشىن مەملەكەتتىك ءتىلدى ەركىن مەڭگەرۋ اسا ماڭىزدى. ءسىز سەكىلدى مەملەكەتىك تىلدە سويلەۋگە باسىندا قينالسا دا كەيىن تالابى مەن جىگەرىنىڭ ارقاسىندا انا تىلىندە ەركىن، كوركەم سويلەۋگە قول جەتكىزگەن گەنەرال توقتار اۋباكىروۆ اعامىز سىزگە جاقسى ۇلگى بولا الادى. رەپەتيتور جالداڭىز، قازاقشا كىتاپ وقىڭىز، وتباسىندا قازاقشا سويلەسىڭىز. كوپ كەشىكپەي جاقسى ناتيجەگە قول جەتكىزە الاسىز. وتان قورعاۋ جولىنداعى اسا ماڭىزدى جۇمىسىڭىزعا ساتتىلىك تىلەيمىن!" - دەدى.
بۇگىن قورعانىس ءمينيسترىنىڭ تاعى ءبىر ۆيدەوسى جەلىدە جاريالاندى. وندا مينيستر "جۋرناليستەر وكپەلەدى مە؟" دەيدى، ارتىنشا ۆيدەوعا ءتۇسىرۋشى ادام "جۋرناليستەر ەمەس، حالىق سول ۆيدەونى كورىپ، سىناپ جاتىر" دەيدى. وعان قورعانىس ءمينيسترى: ء"اا، قازاقتاردا ءبىر ماقال بار. وكپەلەسەڭ كوشىپ كەت" دەپ جاۋاپ قاتادى. مينيستر مەن ۆيدەوعا ءتۇسىرۋشى اراسىندا ارتىنشا قانداي ديالوگ بولعانى بەلگىسىز. سەبەبى جەلىگە 13 سەكۋندتىق ۆيدەو عانا جاريالاندى.
قوعام ءبىر اپتانىڭ ىشىندە ەكى مارتە مەملەكەتتىك تىلگە قاتىستى داۋعا ىلىككەن ءمينيستردى سىنعا الۋدا. "قازاقتى قورعايتىن ءمينيستردىڭ سيقى وسى ما", "مەملەكەتتى مەملەكەتتىك ءتىلدى بىلمەيتىن جان قالاي قورعاماق", "قازاقتى قازاق تىلىنە قىرىن قارايتىن جان جاۋدان قورعايدى دەگەنگە سەنبەيمىن" جانە ت.ب پىكىرلەر جەلىدە جازىلىپ جاتىر. ال ءبىز ءوز تاراپىمىزدان مەملەكەتتىك تىلگە شورقاق مينيستر مىرزا اتىلمىش سىننان كەيىن ءتىلدى تەرەڭىرەك ۇيرەنىپ، وقۋعا تالپىناتىن شىعار دەگەن ۇمىتتەمىز.
"ادىرنا" ۇلتتىق پورتالى
