Qorǵanys mınıstri Rýslan Jaqsylyqovtyń sózderi búginde qoǵamda qyzý talqyǵa túsýde. Birneshe kún buryn mınıstr jýrnalısterdiń suraǵyna jaýap berý barysynda "Nege qazaq tilinde suhbat bermeısiz?", – degen suraqqa: "Vy znaete, vot posmotrıte: nash Pervyı Prezıdent–Elbasy govorıl tak: "Kogda sobıraıýtsıa 100 kazahov ı sredı nıh odın ne kazahoıazychnyı, togda my perehodım na rýsskıı ıazyk dlıa togo, chtoby ne oskorbıt chı-to chývstva. Poetomý kogda my s vamı býdem odın na odın razgovarıvat, to qazaqsha sóıleımiz. Jaraı ma?", – degen edi.
Mınıstr bul jaýabyna qoǵam óz narazylyǵyn bildirip, "memlekettik tildi bilmeıtin mınıstrdiń keregi joq" dep áleýmettik jelige jazbalar qaldyryp jatty. Mysaly aqyn, depýtat Qazybek Isa bylaı dep jazba qaldyrdy. "Tilin qorǵaı almaǵan mınıstr Elin qalaı qorǵaıdy? Qorǵanys mınıstri aıtyp turǵan sol memlekettik tilimizdi beıshara jaǵdaıǵa túsirgen túsinikti elbasymen birge zeınetke ketirý kerek endi. Al “Patrıot bolý úshin Memlekettik tildi bilý mindetti emes!”-dep, paradoks pıǵyldaǵy saýatsyz sózi úshin Qorǵanys mınıstri Rýslan Jaqsylyqovty ózge elde bolsa, bir kún de ustamas edi… Bıligi dúbára elde mundaı masqara kúnara bola beredi! Tek Memlekettik tildi mindetteıtin zań kerek!" , - dep jazdy ol.
QR Parlamenti Májilisiniń depýtaty, aıtysker aqyn Amanjol Áltaı bolsa mınıstrge bylaı dep jazba arnady: "Rýslan Fatıhuly, siz qatardaǵy azamattyń biri emes, arqasyna el amanatyn arqalaǵan Qorǵanys mınıstrisiz. Sondyqtan da memlekettik tilge salǵyrttyq tanytpaı, qurmetpen qaraýǵa tıissiz.
Memlekettik tilde sóıleý arqyly artyńyzdaǵy san myńdaǵan sarbazdarǵa ónege kórsetýge mindetti ekenińizdi esten shyǵarmańyz. Áskerimizdiń jáne onyń keńsesiniń tili tolyq qazaqsha bolatyn ýaqyt jetti. Ózińiz aıtqandaı, qyryq qazaq otyryp ortadaǵy jalǵyz ózge ult ókili úshin orys tilinde sóıleý Keńestik júıeden qalyp qoıǵan otarlyq sananyń kórinisi.
Sondyqtan da táýelsiz eldiń qolbasshy generaly retinde bul máselege jańasha qarańyz. Men sizdiń áskerı maman retinde kásibı tájirıbeńizge, atqaryp kele jatqan eńbegińizge qurmetpen qaraımyn.
Otanymyzdyń áskerin basqarý úshin memlekettik tildi erkin meńgerý asa mańyzdy. Siz sekildi memleketik tilde sóıleýge basynda qınalsa da keıin talaby men jigeriniń arqasynda ana tilinde erkin, kórkem sóıleýge qol jetkizgen general Toqtar Áýbákirov aǵamyz sizge jaqsy úlgi bola alady. Repetıtor jaldańyz, qazaqsha kitap oqyńyz, otbasynda qazaqsha sóılesińiz. Kóp keshikpeı jaqsy nátıjege qol jetkize alasyz. Otan qorǵaý jolyndaǵy asa mańyzdy jumysyńyzǵa sáttilik tileımin!" - dedi.
Búgin Qorǵanys mınıstriniń taǵy bir vıdeosy jelide jarııalandy. Onda mınıstr "Jýrnalıster ókpeledi me?" deıdi, artynsha vıdeoǵa túsirýshi adam "Jýrnalıster emes, halyq sol vıdeony kórip, synap jatyr" deıdi. Oǵan Qorǵanys mınıstri: "Áá, qazaqtarda bir maqal bar. Ókpeleseń kóship ket" dep jaýap qatady. Mınıstr men vıdeoǵa túsirýshi arasynda artynsha qandaı dıalog bolǵany belgisiz. Sebebi jelige 13 sekýndtyq vıdeo ǵana jarııalandy.
Qoǵam bir aptanyń ishinde eki márte memlekettik tilge qatysty daýǵa ilikken mınıstrdi synǵa alýda. "Qazaqty qorǵaıtyn mınıstrdiń sıqy osy ma", "Memleketti memlekettik tildi bilmeıtin jan qalaı qorǵamaq", "Qazaqty qazaq tiline qyryn qaraıtyn jan jaýdan qorǵaıdy degenge senbeımin" jáne t.b pikirler jelide jazylyp jatyr. Al biz óz tarapymyzdan memlekettik tilge shorqaq mınıstr myrza atylmysh synnan keıin tildi tereńirek úırenip, oqýǵa talpynatyn shyǵar degen úmittemiz.
"Adyrna" ulttyq portaly
