جەر رەسۋرستارى جانە پايدالى قازبالار حالىققا تيەسىلى مە؟ بۇل سۇراققا كونستيتۋتسيالىق كەڭەستىڭ اپپارات جەتەكشىسى باقىت نۇرمۇحانوۆ جاۋاپ بەردى، دەپ جازادى "ادىرنا" ۇلتتىق پورتالى baq.kz-كە سىلتەمە جاساپ.
اتا زاڭنىڭ 6-بابىنا وزگەرىستەر ەنگىزىلىپ وتىر. بۇگىندە جەر ونىڭ قويناۋى، وسىمدىك جانە جانۋارلار الەمى جانە باسقا دا پايدالى قازبالار مەملەكەتتىڭ مەنشىگىندە دەپ جازىلعان. ەندى مەملەكەتتىڭ مەنشىگىندەگى جەر حالىققا تيەسىلى دەپ وزگەرتىلىپ وتىر. بۇل وزگەرىستىڭ ۇلكەن ساياسي-قوعامدىق ءمانى بار. وسى قۇندىلىقتاردىڭ ناقتى يەسى كىم ەكەنى كورسەتىلىپ وتىر. وسى باپتا حالىقتىڭ اتىنان ارەكەت ەتەتىن مەملەكەت ءوزىنىڭ سايلانعان پرەزيدەنت، پارلامەنت جانە ۇكىمەت ارقىلى جەر قاتىناستارىن رەتتەيتىن بولادى. وزدەرىڭىزگە ءمالىم، قازىر جەر كودەكسى بار. وسىعان وراي قابىلدانىپ وتىرعان شەشىم، - دەدى سپيكەر ورتالىق كوممۋنيكاتسيالار الاڭىندا ءوتىپ جاتقان بريفينگتە.
ونىڭ ايتۋىنشا، زاڭعا مۇنداي وزگەرىس جاساۋ كەزىندە حالىقارالىق تاجىريبە ەسكەرىلگەن.
ارينە، حالىقارالىق تاجىريبە ەسكەرىلدى. وزدەرىڭىز بىلەتىندەي، بىلتىر عانا بۇل ماسەلە ۇزاق قارالدى. شەتەلدىكتەرگە جانە شەتەلدىك زاڭدى تۇلعالارعا جەردى مەنشىگىنە بەرمەۋ تۋرالى بۇرىندا شەشىم قابىلدانعان بولاتىن. كوپتەگەن ەلدىڭ اتا زاڭدارىندا وسى جەر تابيعات بايلىقتارى حالىقتىڭ مەنشىگىندە دەگەن ەرەجە بار. سول ەسكەرىلىپ، ۇسىنىلىپ وتىر، - دەدى باقىت نۇرمۇحانوۆ.
"ادىرنا" ۇلتتىق پورتالى
