قازاقستاننىڭ قارۋلى كۇشتەرى ۇقشۇ-عا مۇشە ەلدەرمەن وقۋ-جاتتىعۋ وتكىزۋگە دايىندالۋدا، دەپ حابارلايدى “ادىرنا” ۇلتتىق پورتالى.
باس شتاب باستىعىنىڭ ورىنباسارى – جەدەل جوسپارلاۋ دەپارتامەنتىنىڭ باستىعى گەنەرال-مايور مارات ايماشەۆ ۇجىمدىق قاۋىپسىزدىك تۋرالى شارت ۇيىمى بىرىككەن شتابى باستىعىنىڭ ءبىرىنشى ورىنباسارى گەنەرال-لەيتەنانت حاسان كالوەۆتىڭ باسشىلىعىمەن وتكەن العاشقى شتابتىق كەلىسسوزدەرگە قاتىستى.
ازاتتىق رۋحىنىڭ مالىمەتىنشە، كەڭەسكە ارمەنيا، بەلارۋس، قازاقستان، قىرعىزستان، رەسەي، تاجىكستان، ۇقشۇ حاتشىلىعى مەن بىرىككەن شتابىنىڭ وكىلدەرى دە قاتىستى.
تالقىلاۋعا نەگىز بولعان تاقىرىپ 2022 جىلعا بەكىتىلگەن جوسپارعا سايكەس ۇيىمعا مۇشە ەلدەردىڭ ورتالىق ازيا وڭىرىندە بىرلەسكەن وقۋ-جاتتىعۋلارىن وتكىزۋ بولدى.
«بيىلعى جىلدىڭ قازان ايىندا قازاقستان اۋماعىندا جەدەل دەن قويۋ ۇجىمدىق كۇشتەرىنىڭ «ءوزارا ءىس-قيمىل – 2022» كوماندالىق-شتابتىق وقۋ-جاتتىعۋلارى، بارلاۋ كۇشتەرى مەن قۇرالدارىنىڭ «ىزدەۋ – 2022» ارنايى وقۋ-جاتتىعۋى جانە ماتەريالدىق-تەحنيكالىق قامتاماسىز ەتۋ بولىمشەلەرىنىڭ «ەشەلون – 2022» ارنايى وقۋ-جاتتىعۋ وتەدى»، - دەلىنگەن قر قورعانىس مينيسترلىگىنىڭ ءباسپاسوز حابارلاماسىندا.
ورتالىق ازيا ءوڭىرىنىڭ جەدەل ورىستەتۋ ۇجىمدىق كۇشتەرىنىڭ «شەكارا – 2022» بىرلەسكەن وقۋ-جاتتىعۋىن تاجىكستان اۋماعىندا وتكىزۋ جوسپارلانىپ وتىر. سونىمەن قاتار قىرعىزستاندا بىتىمگەرشىلىك بولىمشەلەرىنىڭ «مىزعىماس باۋىرلاستىق – 2022» كوماندالىق-شتابتىق وقۋ-جاتتىعۋى وتەتىنىن ايتا كەتكەن ءجون.
ءىس-شارالار ۇقشۇ ۇجىمدىق قاۋىپسىزدىك جۇيەسىنىڭ ماقساتى بويىنشا تاپسىرمالاردى ورىنداۋعا دايىندىعىن ارتتىرۋعا باعىتتالعان.
“ادىرنا” ۇلتتىق پورتالى
