نارحوز ۋنيۆەرسيتەتى ۋكراينا ازاماتتارىنا ءبىلىم گرانتتارىن ۇسىندى

2956
Adyrna.kz Telegram
فوتو: نارحوز ۋنيۆەرسيتەتى سايتىنان
فوتو: نارحوز ۋنيۆەرسيتەتى سايتىنان

نارحوز ۋنيۆەرسيتەتى ۋكراينا ازاماتتارىنا ءبىلىم گرانتتارىن ۇسىنادى. وقۋعا ءتۇسۋ ءۇشىن ءاربىر ادام سۇحباتتان ءوتۋى مىندەتتى. ۋكراينا ازاماتتارىنان قۇجاتتاردى قابىلداۋ 16 مامىردا باستالادى، دەپ حابارلايدى «ادىرنا» ۇلتتىق پورتالى.

گرانتتاردى ۋكراينا ازاماتتارى، ياعني 2022 جىلى مەكتەپ بىتىرۋشىلەر مەن ۋكراينا نەمەسە رەسەي ۋنيۆەرسيتەتتەرىنەن اۋىستىرىلعان ستۋدەنتتەر الا الادى.

ءبىلىم گرانتى وقۋ اقىسىن 100% وتەيدى جانە جاتاقحانادا تەگىن تۇرۋ مەن جول ءجۇرۋ شىعىندارىن قامتاماسىز ەتەدى.

ءتيىستى شەشىمدى Narxoz ۋنيۆەرسيتەتىنىڭ باسقارما مۇشەلەرى ءبىراۋىزدان قابىلدادى.

«نارحوز ۋنيۆەرسيتەتىنە ءتۇسۋ ءۇشىن ءبىتىرۋشىنىڭ سەرتيفيكاتىنىڭ ورتاشا اكادەميالىق بالى 5,00-دەن كەمىندە 4,00 (نەمەسە 80%) بولۋى كەرەك. ۋكراينانىڭ نەمەسە رەسەيدىڭ ۋنيۆەرسيتەتتەرىنەن اۋىسۋدى جوسپارلاعان ستۋدەنتتەر 2021 جىلدىڭ كۇزگى سەمەسترىنەن كەيىن نەمەسە 2022 جىلدىڭ كوكتەمگى سەمەسترىنەن كەيىنگى جالپى GPA باعالارى بويىنشا الدىڭعى ۋنيۆەرسيتەتتە كەمىندە 70% بولعان جاعدايدا Narxoz-قا تۇسە الادى. سونداي-اق ءاربىر ادام سۇحباتتان ءوتۋى مىندەتتى. ۋكراينا ازاماتتارىنان قۇجاتتاردى قابىلداۋ 16 مامىردا باستالادى» ، دەپ حابارلادى ۋنيۆەرسيتەتتىڭ ءباسپاسوز قىزمەتى.

ايتا كەتەيىك، نارحوز  ۋنيۆەرسيتەتى – بولاشاق ەكونوميستەردى، قارجىگەرلەردى، اۋديتورلاردى، ەسەپشىلەردى، ماركەتولوگتاردى، زاڭگەرلەردى، مەنەدجەرلەر مەن تسيفرلىق تەحنولوگيالار، قوناقجايلىلىق، تۋريزم جانە مەملەكەتتىك باسقارۋ سالاسىنداعى مامانداردى دايىندايتىن الماتى قالاسىندا ورنالاسقان جەتەكشى جەكەمەنشىك ۋنيۆەرسيتەت.

«ادىرنا» ۇلتتىق پورتالى

پىكىرلەر