«اق جول» مۇناي ونىمدەرى نارىعىنداعى دەلدالداردى جويۋ جانە كوتەرمە باعانىڭ كوتەرىلۋىنە جول بەرمەۋ شارالارىن قابىلداۋدى تالاپ ەتەدى. بۇل تۋرالى فراكتسيانىڭ دەپۋتاتتىق ساۋالىن اندرەي ليننيك مالىمدەدى، دەپ حابارلايدى “ادىرنا” ۇلتتىق پورتالى.
«اق جول» فراكتسياسىنىڭ دەپۋتاتتارى قر پرەمەر-ءمينيسترىنىڭ ءبىرىنشى ورىنباسارى ر. ۆ. سكليارعا ۇندەۋ جولدادى.
«اق جول» پارتياسىنا مۇناي ونىمدەرىن بولشەك ساۋدادا وتكىزۋ سالاسىنىڭ كاسىپكەرلەرى وتىنىشپەن جۇگىنۋدە.ماسەلەن، ۇكىمەت مەملەكەت باسشىسىنىڭ ب.ج. 11 قاڭتارداعى تاپسىرماسىن ورىنداۋ ءۇشىن مۇناي ونىمدەرىنە اكتسيزدەردىڭ مولشەرىن بەلگىلەيتىن قاۋلى قابىلدادى (2022 جىلدىڭ 24 ناۋرىزىنداعى №155). قاۋلى جوباسىن تالقىلاۋ كەزىندە قازاقستاندىق وتىن قاۋىمداستىعى بۇرىن مۇناي ونىمدەرىنە اكتسيزدەردىڭ ۇلعايۋى كەزىندە ولاردىڭ كوتەرمە باعاسى اۆتوماتتى تۇردە وسكەنىنە الاڭداۋشىلىق ءبىلدىردى جانە اكتسيزدى ارتتىرۋ كەزىندە كوتەرمە باعالاردىڭ كوتەرىلۋىنە جول بەرمەۋ بويىنشا قاتاڭ باقىلاۋ ورناتۋدى ۇسىندى.
قاۋىمداستىقتىڭ بۇل ۇسىنىسى نازاردان تىس قالدى. بۇل رەتتە ۇلتتىق ەكونوميكا مينيسترلىگى باسەكەلەس ورتادا اكتسيزدەردىڭ مولشەرى اكتسيزدەلەتىن مۇناي ونىمدەرىنىڭ نارىقتىق باعاسىنا اسەر ەتپەيدى، ال تۇپكىلىكتى باعا دەلدالداردىڭ سانى مەن ۇستەمەاقىنىڭ مولشەرىنە، ىشكى باعالاردىڭ الەمدىك باعالارمەن اراقاتىناسىنا بايلانىستى بولادى دەپ ەسەپتەيدى. بۇدان باسقا، مينيسترلىك ججم-ءدى بولشەك ساۋدادا وتكىزۋگە شەكتى باعالاردى 180 كۇنتىزبەلىك كۇنگە بەلگىلەۋدى، ججم ءوندىرۋ مەن ءبولۋدى رەفورمالاۋ جونىندەگى شارالار كەشەنىن ەسكەرە وتىرىپ، اكتسيزدەردىڭ ءوسۋى باعانىڭ وسۋىنە الىپ كەلمەيدى دەپ بەكىتەدى”،- دەدى ولار.
ايتۋلارىنشا، قاۋىمداستىقتىڭ قاۋىپتەرى راستالعان. ياعني، مۇناي ونىمدەرىن بولشەك ساۋدا ارقىلى وتكىزۋشىلەر رەسۋرس ۇستاۋشىلاردان ديزەل وتىنىنىڭ جۇكتەلمەگەن تولەنگەن كولەمىن جەتكىزۋ اكتسيزدەردىڭ جاڭا مولشەرلەمەلەرىن ەسكەرە وتىرىپ بولاتىندىعى تۋرالى حابارلاما الا باستاعان. بۇل حابارلامالار مەملەكەت باسشىسىنىڭ «بەنزين وندىرۋشىلەردەن جانە ءارتۇرلى دەلدالداردان اكتسيزدەر تۇرىندەگى مارجانى باعانىڭ وسۋىنە جول بەرمەي، بيۋدجەتتىڭ پايداسىنا الۋ» تاپسىرماسىن تىكەلەي ورىنداماۋعا تىرىسۋ بولىپ تابىلاتىندىعىن ايتتى.
“قازىر قازاقستاندا ديزەل وتىنىنا قاتىستى جاعداي بىلتىرعى ستسەناري بويىنشا دامۋدا: 2021 جىلدىڭ باسىندا تاپشىلىق قالىپتاسا باستادى، باعانىڭ كۇرت ءوسۋى ليترىنە 190 تەڭگەدەن 260 تەڭگەگە دەيىن بولدى، ال تامىز-قىركۇيەك ايلارىندا جاعداي وتە كۇردەلى بولدى. بۇگىنگى تاڭدا ديزەل وتىنىنىڭ تاپشىلىعى جانە كوتەرمە باعانىڭ ءوسۋى بايقالادى، رەسۋرستاردى ۇستاۋشىلار شىعارىلىمدى مينيمۋمعا دەيىن شەكتەدى، ال كەيبىرەۋلەرى باعانىڭ ودان ءارى كوتەرىلۋىن كۇتىپ، كوتەرمە ساۋدانى مۇلدەم توقتاتتى. كەيبىر جەتكىزۋشى-دەلدالدار، كولىك شىعىندارىن، مۇناي بازاسىنىڭ شىعىندارىن جانە جقس وپەراتسيالىق شىعىندارىن ەسەپتەمەگەندە، ديزەل وتىنىن زاۋىتتان تونناسىنا 280 000 تەڭگەگە دەيىن كوتەرىڭكى كوتەرمە باعامەن ۇسىنادى. بۇل رەتتە، ديزەل وتىنىنا مەملەكەت بەلگىلەگەن بولشەك ساۋدا باعاسى ليترىنە 230-دان 260 تەڭگەگە دەيىن وزگەرىپ وتىرادى”،- دەدى «اق جول» فراكتسياسىنىڭ دەپۋتاتتارى.
بولشەك ساتۋشىلار تەك شىعىنعا ۇشىرايدى نەمەسە ءوز قىزمەتىن توقتاتاتىندارىن ايتا كەلە، جوعارىدا ايتىلعاندارعا بايلانىستى، «اق جول» فراكتسياسى مەملەكەت باسشىسىنىڭ تاپسىرماسىن مۇلتىكسىز ورىنداۋ ماقساتىندا مۇناي ونىمدەرىنە كوتەرمە باعانىڭ كوتەرىلۋىنە جول بەرمەۋ جانە كوتەرمە جەتكىزۋشىلەر مەن دەلدالداردىڭ تابەتىن تەجەۋ جونىندە پارمەندى شارالار قابىلداۋدى تالاپ ەتتى
ارمان سەرىكۇلى،
“ادىرنا” ۇلتتىق پورتالى
