قاسيەتتى رامازان ايىندا استاناداعى ازىرەت سۇلتان مەشىتى قىزمەتكەرلەرى اۋىزاشارعا كەلگەن قارت كىسىنى جۇلقىلاپ شىعارىپ جىبەرگەن. وسى جاعدايعا كۋا بولعان جۋرناليست اساۋبەك ايىمبەتوۆ وقيعانىڭ قالاي بولعانىن Instagaram-پاراقشاسىنا جازدى.
«جازايىن با، جازبايىن با ۇزاق ويلاندىم. بۇل كورىنىس كوز الدىمنان كەتپەي، جۇرەگىمە قادالىپ قالدى. وسى جۇما كۇنى ارىپتەسىم ەكەۋمىز استاناداعى ازىرەت سۇلتان مەشىتىنە باردىق اۋىزاشارعا. قازىر اللا ۇيىندەگى اۋىزاشارعا تالونمەن وتكىزەدى ەكەن. كىردىك. ارىپتەسىم قىز بولعاندىقتان، ايەلدەر زالىنا كىردىك. كوز جۇگىرتىپ ءوتتىم. ەرلەر مەن ايەلدەر ارالاسىپ وتىرعان ۇستەلدەر دە بار ەكەن. مۇنىڭ الدىندا جاڭاعى ارىپتەسىم كىل ەرلەردىڭ ورتاسىندا، مەنىڭ قاسىمدا وتىرعان ەدى. حوش، سونىمەن اۋىزاشار باستالدى. حيدجاب كيگەن قىز كەلدى دە: «مەن ەر اداممەن ءبىر ۇستەلدە اس ىشپەيمىن» دەپ مىنەزىن كورسەتە باستادى. اكىمگەردى شاقىرىپ، ول ازامات مەنى وزگە ۇستەلگە اۋىستىراتىن بولدى. سول ساتتە وتە ىڭعايسىز كورىنىسكە تاپ بولدىم. تالونسىز، شاقىرۋسىز كەلگەن قازاق اجەي ۇستەل باسىندا اس ءىشىپ وتىرعان جەرىنەن، ونى ادمينستراتور جۇلقىلاي باستادى. «شىعىڭىز، ەرەجە بار، تالاپ بار» دەپ سامايىن اق شالعان كەيۋانانى كوپتىڭ كوزىنشە ماسقارالاي باستادى. ءتىپتى كۇزەتشىلەردى شاقىردى. مەنىڭ كوزىم اتىزداي بولدى. قاسيەتتى رامازان ايىندا، مەيىرىم مەن تازالىق مەكەنى مەشىتتە وسىنداي جاعداي بولادى دەپ ويلاماپپىن. اللانىڭ ۇيىندە ايقاي شىعىپ، جۇپىنى كيىنگەن مىسكىن اجەيدى جۇلقىلايدى دەپ كىم ويلاعان؟ بۇل ماسەلەنى وزگەشە شەشۋگە بولماس پا ەدى؟ ۇياتتان بۇرىن، بۇل سۇمدىق كورىنىس! كاسىپكەرلەردىڭ قاراجاتىنا جاسالىپ وتىرعان اۋىزاشاردا جاعدايى جوق كەيۋانانى سىرتقا قۋ قاي شاريعاتتا كورسەتىلگەن؟ مەنەن مەشىت قىزمەتكەرلەرى كەشىرىم سۇرادى! مەنى قويشى، انا اجەيدەن ەشكىم كەشىرىم سۇرامادى-اۋ دەپ ءالى ۇيقىم ءتورت ءبولىنىپ ءجۇر! اللا ۇيىندەگى وقيعا مەن ءۇشىن شوك!
استانا دۇلەي داۋىل مەن تولاسسىز جاڭبىر ورداسىنا اينالماي قايتەدى، ەل تىلەگى مەن ءۇمىتى جانعان اللا ۇيىندە الگىندەي وقيعالار بولىپ جاتقاندا! مەنى مەشىت قىزمەتكەرلەرى كەرى شاقىرعاندا، كىرمەدىم. ۇيگە تارتتىم تىكە. مۇنداي جەردە وتىرعانشا، ۇيدەن اس ىشكەنىم 10 ەسە ارتىق. اجەي ىشتە قالدى. ءارى قارايعى تاعدىرى ماعان بەيمالىم. سول كۇنى مەن جارىتىپ اس ىشپەدىم. ارىپتەسىم كۋا»، – دەپ جازدى جۋرناليست اساۋبەك ايىمبەتوۆ.
ايتا كەتەيىك، ازىرەت سۇلتان مەشىتى رامازاننىڭ سونىڭا دەيىن اۋىزاشار بەرەدى. تالوندى تەك اقشام نامازىنا كەلگەندەر عانا الا الادى- دەپ ءتۇيدى، SN KZ اقپاراتتىق پورتالى
http://qasym.kz
