سۋلەيمان دەميرەل اتىنداعى ۋنيۆەرسيتەت كوللەدج مۇعالىمدەرىنە ارنالعان ساباقتار وتكىزەتىن بولادى. بۇل تۋرالى ۋنيۆەرسيتەت رەكتورى داۆرونجون گايپوۆ ALLVET وقۋ-زەرتحاناسىنىڭ اشىلۋ سالتاناتىندا ايتتى.
«ۋنيۆەرسيتەتىمىزدە Erasmus+ باعدارلاماسى ALLVET جوباسىنىڭ اياسىندا وقۋ-زەرتحاناسىن اشىپ وتىرمىز. مۇندا تەحنيكالىق جانە كاسىپتىك ءبىلىم بەرۋ ۇيىمدارىنىڭ وقىتۋشىلارىنا ECTS جۇيەسى بويىنشا كوللەدجدەگى ءبىلىم پروتسەستەرىن ازىرلەۋ: سيللابۋس دايىنداۋ، ساباقتىڭ قاجەتتىلىكتەرىن انىقتاۋ، ۇيرەنۋ ماقساتتارى مەن ناتيجەلەرىن بولجاۋ، باعالاۋ ت. ب. تاقىرىپتار بويىنشا ساباق بەرىلەدى. كوللەدج مۇعالىمدەرىنە ارنالعان ترەنينگتەردى سدۋ وقىتۋشىلارى جۇرگىزەدى. الداعى ۋاقىتتا جوبا اياسىندا اتقارالاتىن جۇمىستار ناتيجەلى بولادى دەگەن ۇمىتتەمىن. سونداي-اق زەرتحانانى ۋنيۆەرسيتەت وقىتۋشىلارى دا پايدالانا الادى. مۇنداي حالىقارالىق جوبالارعا بەلسەندى تۇردە قاتىسۋىمىز كەرەك، بىزدە بار مۇمكىندىكتەردى ءتيىمدى پايدالانۋ قاجەت. قىزمەتكەرلەرىمىزدىڭ يدەيالارىن، جوبالارىن قولداۋعا دايىنبىز»، – دەدى رەكتور.
سدۋ حالىقارالىق قاتىناستار ءوفيسىنىڭ ديرەكتورى ءادىلجان انايدىڭ ايتۋىنشا، مۇنداي وقۋ-زەرتحاناسى قازاقستان بويىنشا ءۇش ۋنيۆەرسيتەتتە بار.
«ALLVET وقۋ-زەرتحاناسى ەلىمىز بويىنشا تەك نارحوز جانە حالىقارالىق IT ۋنيۆەرسيتەتىندە عانا بار ەدى. ەندى ۋنيۆەرسيتەتىمىز سولاردىڭ قاتارىنا قوسىلدى. ونلاين ساباقتار، كەزدەسۋلەر وتكىزۋ ماقساتىندا مۋلتيمەديالىق تەلەديدار قويىلدى جانە جۇمىس ىستەۋگە ىڭعايلى سەنسورلىق تاقتا ورناتىلدى. سونداي-اق زەرتحانا ىشىندەگى نوۋتبۋكتەر ارنايى كود بويىنشا اشىلاتىن ۇياشىقتاردا تۇرادى»، – دەپ ءتۇسىندىردى ول.
شارا بارىسىندا Padlet جانە ZipGrade قوسىمشالارى تانىستىرىلدى. Padlet قوسىمشاسىنىڭ Timeline فۋنكتسياسى وقىتۋشىلارعا سيللابۋستاعى تاپسىرمالاردى بىلىمگەرلەرگە ۆيزۋالدى فورماتتا ۇسىنۋعا مۇمكىندىك بەرەدى. ال ZipGrade قوسىمشاسى وقىتۋشىلارعا تەست جاۋاپتارىن سكانەرلەۋ ارقىلى تەز ءارى جەڭىل تەكسەرۋگە مۇمكىندىك بەرەدى. سكانەردەن وتكىزگەندە قوسىمشا قانشا سۇراق دۇرىس ەكەنىن بىردەن پايىزدىق مولشەرلەمەمەن كورسەتەدى جانە PDF نۇسقادا اناليز ۇسىنادى.
