Suleiman Demirel atyndaǧy universitet kolledj mūǧalımderıne arnalǧan sabaqtar ötkızetın bolady. Būl turaly universitet rektory Davronjon Gaipov ALLVET oqu-zerthanasynyŋ aşylu saltanatynda aitty.
«Universitetımızde Erasmus+ baǧdarlamasy ALLVET jobasynyŋ aiasynda oqu-zerthanasyn aşyp otyrmyz. Mūnda tehnikalyq jäne käsıptık bılım beru ūiymdarynyŋ oqytuşylaryna ECTS jüiesı boiynşa kolledjdegı bılım prosesterın äzırleu: sillabus daiyndau, sabaqtyŋ qajettılıkterın anyqtau, üirenu maqsattary men nätijelerın boljau, baǧalau t. b. taqyryptar boiynşa sabaq berıledı. Kolledj mūǧalımderıne arnalǧan treningterdı SDU oqytuşylary jürgızedı. Aldaǧy uaqytta joba aiasynda atqaralatyn jūmystar nätijelı bolady degen ümıttemın. Sondai-aq zerthanany universitet oqytuşylary da paidalana alady. Mūndai halyqaralyq jobalarǧa belsendı türde qatysuymyz kerek, bızde bar mümkındıkterdı tiımdı paidalanu qajet. Qyzmetkerlerımızdıŋ ideialaryn, jobalaryn qoldauǧa daiynbyz», – dedı rektor.SDU Halyqaralyq qatynastar ofisınıŋ direktory Ädıljan Anaidyŋ aituynşa, mūndai oqu-zerthanasy Qazaqstan boiynşa üş universitette bar. «ALLVET oqu-zerthanasy elımız boiynşa tek Narhoz jäne Halyqaralyq IT universitetınde ǧana bar edı. Endı universitetımız solardyŋ qataryna qosyldy. Onlain sabaqtar, kezdesuler ötkızu maqsatynda multimedialyq teledidar qoiyldy jäne jūmys ısteuge yŋǧaily sensorlyq taqta ornatyldy. Sondai-aq zerthana ışındegı noutbukter arnaiy kod boiynşa aşylatyn ūiaşyqtarda tūrady», – dep tüsındırdı ol. Şara barysynda Padlet jäne ZipGrade qosymşalary tanystyryldy. Padlet qosymşasynyŋ Timeline funksiiasy oqytuşylarǧa sillabustaǧy tapsyrmalardy bılımgerlerge vizualdy formatta ūsynuǧa mümkındık beredı. Al ZipGrade qosymşasy oqytuşylarǧa test jauaptaryn skanerleu arqyly tez ärı jeŋıl tekseruge mümkındık beredı. Skanerden ötkızgende qosymşa qanşa sūraq dūrys ekenın bırden paiyzdyq mölşerlememen körsetedı jäne PDF nūsqada analiz ūsynady.
