قاڭتار وقيعاسى كەزىندە وققا ۇشقان 4 جاسار ايكوركەمنىڭ سۋرەتى ءوشىرىلدى. ەندى بۇل نىسانعا كامەرالار ورناتىلماق، دەپ حابارلايدى "ادىرنا" ۇلتتىق پورتالى.
"ازاتتىقتىڭ" جازۋىنشا، "الاتاۋ جارىق كومپانياسى" سۋرەتتى وشىرۋگە ءماجبۇر ەكەنىن مالىمدەپ، ترانسفورماتور ستانتسياسىن "جوعارى دارەجەدەگى قاۋىپتى نىسان" دەپ اتادى. كومپانيا وكىلدەرىنىڭ ايتۋىنشا، "نىسانعا سۋرەت سالماق تۇگىلى جاقىنداۋدىڭ ءوزى قاۋىپتى".
– مىنانىڭ ىشىندە 10 مىڭ ۆولتتىق توق كەرنەۋى بار بار. وعان سۋرەت سالماق تۇگىلى ءبىزدىڭ رۇقساتسىز ءتىپتى جاقىنداۋعا دا بولمايدى... بۇگىن سۋرەتتى سالعان كەزدە وزگە ادامدارعا قاۋىپتى ەكەنى جايلى ەسكەرتكەن بەلگىلەر سىرلانعان، – دەدى "الاتاۋ جارىق كومپانياسىنىڭ" جەلىلەردى تاراتۋ باسقارماسىنىڭ جەتەكشىسى دميتري حلىبوۆ.
ول ترانسفورماتوردا ءجيى مۋرالدار پايدا بولعاندىقتان ونىڭ ماڭىنا كامەرا ورناتۋ ماسەلەسىن قاراستىراتىنىن ايتتى. ونىڭ ايتۋىنشا، بۇعان دەيىن ترانسفورماتورعا سالىنعان سۋرەتتەر كومپانيا باسشىلىعىمەن "كەلىسىلمەگەن". "ەگەر سۋرەتشىلەر سىزدەردەن رۇقسات سۇراسا، كەلىسىم بەرەسىزدەر مە؟" دەگەن سۇراققا ول "كەمىندە ءبىز ءوتىنىشتى قاراستىرامىز" دەپ جاۋاپ بەردى.
كومپانيا وكىلى كامەرا ورناتىلىپ، سۋرەت سالعاندار انىقتالسا، پوليتسياعا شاعىم ءتۇسىرۋى مۇمكىن ەكەنىن ايتتى. "جۇرت ءوز ۇستانىمدارىن بىلدىرگىسى كەلەتىنىن تۇسىنەمىن، الايدا ونى زاڭ اياسىندا جاساۋ كەرەك" دەدى ول.
ول كومپانيا ەسەبىنەن سۋرەتتەر وشىرىلەتىنىن ايتىپ، وعان شامامەن 200 مىڭ تەڭگەگە دەيىن قاراجات كەتەتىنىن جەتكىزدى.
3 ماۋسىمدا الماتىنىڭ جاروكوۆ-مىڭباەۆ كوشەلەرىنىڭ قيىلىسىنداعى نىسان قابىرعاسىندا قاڭتار كەزىندە وققا ۇشقان 4 جاسار ايكوركەمنىڭ سۋرەتى پايدا بولعان. الەۋمەتتىك جەلىدە جاريالانعان مۋرال تۋرالى جازبادا قاڭتار وقيعاسىن ءادىل تەرگەۋدى تالاپ ەتكەن ۇندەۋ دە بار. بىراق كوپ ۇزاماي ايكوركەمنىڭ سۋرەتى الىنىپ، مۋرال سىرلاندى. كەي بەلسەندىلەر "بيلىك ءتىپتى قازا بولعان كىشكەنتاي قىزدان قورقادى" دەپ جازىپ، ارەكەتتى سىناعان.
بىلتىر بۇل قابىرعادا نازارباەۆتىڭ "كۇشىن جويۋدى" تالاپ ەتكەن مۋرال پايدا بولىپ، كوپ ۇزاماي وشىرىلگەن ەدى.
"ادىرنا" ۇلتتىق پورتالى.
