Qaŋtar oqiǧasy kezınde oqqa ūşqan 4 jasar Aikörkemnıŋ suretı öşırıldı. Endı būl nysanǧa kameralar ornatylmaq, dep habarlaidy "Adyrna" ūlttyq portaly.
"Azattyqtyŋ" jazuynşa, "Alatau jaryq kompaniiasy" surettı öşıruge mäjbür ekenın mälımdep, transformator stansiiasyn "joǧary därejedegı qauıptı nysan" dep atady. Kompaniia ökılderınıŋ aituynşa, "nysanǧa suret salmaq tügılı jaqyndaudyŋ özı qauıptı".
– Mynanyŋ ışınde 10 myŋ volttyq toq kerneuı bar bar. Oǧan suret salmaq tügılı bızdıŋ rūqsatsyz tıptı jaqyndauǧa da bolmaidy... Bügın surettı salǧan kezde özge adamdarǧa qauıptı ekenı jaily eskertken belgıler syrlanǧan, – dedı "Alatau jaryq kompaniiasynyŋ" jelılerdı taratu basqarmasynyŋ jetekşısı Dmitrii Hlybov.Ol transformatorda jiı muraldar paida bolǧandyqtan onyŋ maŋyna kamera ornatu mäselesın qarastyratynyn aitty. Onyŋ aituynşa, būǧan deiın transformatorǧa salynǧan suretter kompaniia basşylyǧymen "kelısılmegen". "Eger suretşıler sızderden rūqsat sūrasa, kelısım beresızder me?" degen sūraqqa ol "kemınde bız ötınıştı qarastyramyz" dep jauap berdı.
Kompaniia ökılı kamera ornatylyp, suret salǧandar anyqtalsa, polisiiaǧa şaǧym tüsıruı mümkın ekenın aitty. "Jūrt öz ūstanymdaryn bıldırgısı keletının tüsınemın, alaida ony zaŋ aiasynda jasau kerek" dedı ol.Ol kompaniia esebınen suretter öşırıletının aityp, oǧan şamamen 200 myŋ teŋgege deiın qarajat ketetının jetkızdı. 3 mausymda Almatynyŋ Jarokov-Myŋbaev köşelerınıŋ qiylysyndaǧy nysan qabyrǧasynda Qaŋtar kezınde oqqa ūşqan 4 jasar Aikörkemnıŋ suretı paida bolǧan. Äleumettık jelıde jariialanǧan mural turaly jazbada Qaŋtar oqiǧasyn ädıl tergeudı talap etken ündeu de bar. Bıraq köp ūzamai Aikörkemnıŋ suretı alynyp, mural syrlandy. Kei belsendıler "bilık tıptı qaza bolǧan kışkentai qyzdan qorqady" dep jazyp, ärekettı synaǧan. Byltyr būl qabyrǧada Nazarbaevtyŋ "küşın joiudy" talap etken mural paida bolyp, köp ūzamai öşırılgen edı.
"Adyrna" ūlttyq portaly.
