قۇقىق قورعاۋشى دينا ءتاڭسارى الەۋمەتتىك جەلىدە ليساكوۆ قالاسى اكىمشىلىگىنىڭ بۇرىنعى قىزمەتكەرىنىڭ 14 تاۋلىككە سوتتالعانىن ايتتى، دەپ حابارلايدى «ادىرنا» ۇلتتىق پورتالى "orda.kz"-كە سىلتەمە جاساپ.
«ليساكوۆ قالاسى اكىمدىگىنىڭ ىشكى ساياسات ءبولىمىنىڭ بۇرىنعى باسشىسى تالعات عابدراحمانوۆ كامەلەتكە تولماعانداردى الكوگولدىك ىشىمدىكتەرگە تارتقانى ءۇشىن اكىمشىلىك سوتپەن 14 تاۋلىككە سوتتالدى» دەدى قۇقىق قورعاۋشى.
ەسكە سالساق، ىشكى ساياسات باسقارماسىنىڭ بۇرىنعى باسشىسى كامەلەتكە تولماعان بالانى زورلادى دەگەن كۇدىككە ىلىنگەن.
تەرگەۋشىلەردىڭ مالىمەتىنشە، ەر ادام قىزدارمەن ينتەرنەت ارقىلى تانىسىپ، كەزدەسۋگە شاقىرىپ، ولارعا تيىسكەن. ول اڭگىمە كەزىندە ءوزىنىڭ ناقتى جاسىن جانە ۇيلەنگەنىن جاسىرىپ وتىرعان. كۇدىكتىنىڭ بالاسى بار.
پوليتسەيلەر قر قىلمىستىق كودەكسىنىڭ 120-بابىنىڭ 3-1-بولىگىنىڭ 1-تارماعى «كامەلەتكە تولماعان بالانى زورلاۋ» بويىنشا قىلمىستىق ءىس قوزعادى. پوليتسيا باسقا زارداپ شەككەندەردى ىزدەستىرىپ جاتىر.
«ادىرنا» ۇلتتىق پورتالى.
