وتاندىق شوۋ-بيزنەستە تاعى دا شۋ شىقتى. ەسكەندىر حاسانعاليەۆتىڭ ءانىن رۇقساتسىز ورىنداعان Qanay-دى كومپوزيتوردىڭ ۇلى زاڭ جۇزىندە جازالاتپاق، دەپ حابارلايدى "ادىرنا" ۇلتتىق پورتالى "ەكسپرەسس ك"-عا سىلتەمە جاساپ.
ءبىرجان حاسانعاليەۆتىڭ ايتۋىنشا، جاس ءانشى ايگىلى سازگەردىڭ "بوزتورعايىم" ءانىن ونىڭ مۇراگەرىنە، ياعني ۇلىنا ەش ەسكەرتپەستەن ءوز رەپەرتۋارىنا قوسىپ، كليپ تۇسىرگەن.
وتاندىق شوۋ-بيزنەستە Qanay لاقاپ اتىمەن تانىلعان نۇربولات قاناي وسىدان ءبىر اي بۇرىن ەسكەندىر حاسانعاليەۆتىڭ "بوزتورعايىم" انىنە تۇسىرگەن بەينەبايانىن جارىققا شىعارعان ەدى. بىراق اتالعان تۋىندىنى ورىنداۋ ءۇشىن كومپوزيتوردىڭ وتباسىنان رۇقسات سۇراماپتى. جاس ءانشىنىڭ بۇل ارەكەتىنە ءبىرجان حاسانعاليەۆ قاتتى اشۋلى.
"ول ءاندى Qanay-دىڭ ورىنداعانىن ءبىر جولداسىمنان ەستىدىم. "مىناۋ سەنىڭ اكەڭنىڭ ءانى عوي. سەنەن رۇقسات سۇرادى ما؟" دەدى. ەشقانداي رۇقسات سۇراعان جوق. ولاي ءاربىر ءاندى رۇقساتسىز ورىنداي بەرۋگە بولمايدى. ەگەر بارلىعى ءدال وسىلاي ءار ءاندى ورىنداپ، كليپ ءتۇسىرىپ، ويىنا كەلگەنىن ىستەسە مەن قانداي مۇراگەرمىن؟ ولاردىڭ بۇل ءىسى دۇرىس ەمەس. حابارلاسىپ، كەلىپ، وسىنداي ءبىر تاقىرىپقا كليپ تۇسىرگىم كەلەدى دەگەن سياقتى ەشتەڭە بولعان جوق. ءبىز زاڭدى مەملەكەتتە تۇرىپ جاتىرمىز. سوعان قوسا قازىر "جاڭا قازاقستان" قۇرىلىپ جاتىر. ءاندى رۇقساتسىز ورىنداعاندارعا نەگە زاڭ بولماۋى كەرەك؟ بۇل — مەنىڭ تىكەلەي قۇقىعىم، ياعني ءبىزدىڭ جانۇيانىڭ تىكەلەي قۇقىعى بۇزىلدى دەگەن ءسوز", — دەيدى حاسانعاليەۆتىڭ ۇلى
كەيىن حاسانعاليەۆتىڭ وكىلدەرى جاس ءانشىنىڭ پروديۋسەرىنە حابارلاسقان. ولاردىڭ سول ساتتەگى جاۋابى ءبىرجان ەسكەندىرۇلىنىڭ نامىسىنا قاتتى تيگەن كورىنەدى.
ء"بىز بۇل ءاندى "حالىق ءانى" دەپ ويلادىق دەپتى پروديۋسەرى. ال وزدەرى كليپكە مۋزىكانىڭ اۆتورى ەسكەندىر حاسانعاليەۆ دەپ جازىپ قويعان. ارينە، وسىنداي ارەكەتتەرى نامىسقا تيەدى. كليپتىڭ شىققانىنا ءبىر ايدان استى، اينالىم ءجۇرىپ جاتىر، ميلليونداعان قارالىمى بار. قازىر زاڭگەرلەر وسى ماسەلەمەن اينالىسىپ جاتىر. ارينە، مەن ءبارىبىر جەڭەمىن. ويتكەنى مۇراگەرى رەتىندە بۇل ءبىزدىڭ قۇقىمىز. مەن بارمىن، انام بار جانە مەنىڭ اپكەم بار. بارلىعى بىزدە زاڭدى تۇردە تىركەلگەندىكتەن، ولار دا زاڭدى تۇردە جاۋاپقا تارتىلادى. ەگەر كەلىسسوز دۇرىس جۇرگىزىلمەسە سوتقا بەرەمىز. بۇل ءىستى سوڭىنا دەيىن اپارامىن", — دەيدى ءبىرجان حاسانعاليەۆ.
"ادىرنا" ۇلتتىق پورتالى
