Otandyq shoý-bızneste taǵy da shý shyqty. Eskendir Hasanǵalıevtiń ánin ruqsatsyz oryndaǵan Qanay-dy kompozıtordyń uly zań júzinde jazalatpaq, dep habarlaıdy "Adyrna" ulttyq portaly "Ekspress K"-ǵa silteme jasap.
Birjan Hasanǵalıevtiń aıtýynsha, jas ánshi áıgili sazgerdiń "Boztorǵaıym" ánin onyń muragerine, ıaǵnı ulyna esh eskertpesten óz repertýaryna qosyp, klıp túsirgen.
Otandyq shoý-bızneste Qanay laqap atymen tanylǵan Nurbolat Qanaı osydan bir aı buryn Eskendir Hasanǵalıevtiń "Boztorǵaıym" ánine túsirgen beınebaıanyn jaryqqa shyǵarǵan edi. Biraq atalǵan týyndyny oryndaý úshin kompozıtordyń otbasynan ruqsat suramapty. Jas ánshiniń bul áreketine Birjan Hasanǵalıev qatty ashýly.
"Ol ándi Qanay-dyń oryndaǵanyn bir joldasymnan estidim. "Mynaý seniń ákeńniń áni ǵoı. Senen ruqsat surady ma?" dedi. Eshqandaı ruqsat suraǵan joq. Olaı árbir ándi ruqsatsyz oryndaı berýge bolmaıdy. Eger barlyǵy dál osylaı ár ándi oryndap, klıp túsirip, oıyna kelgenin istese men qandaı muragermin? Olardyń bul isi durys emes. Habarlasyp, kelip, osyndaı bir taqyrypqa klıp túsirgim keledi degen sııaqty eshteńe bolǵan joq. Biz zańdy memlekette turyp jatyrmyz. Soǵan qosa qazir "Jańa Qazaqstan" qurylyp jatyr. Ándi ruqsatsyz oryndaǵandarǵa nege zań bolmaýy kerek? Bul — meniń tikeleı quqyǵym, ıaǵnı bizdiń januıanyń tikeleı quqyǵy buzyldy degen sóz", — deıdi Hasanǵalıevtiń uly
Keıin Hasanǵalıevtiń ókilderi jas ánshiniń prodıýserine habarlasqan. Olardyń sol sáttegi jaýaby Birjan Eskendirulynyń namysyna qatty tıgen kórinedi.
"Biz bul ándi "halyq áni" dep oıladyq depti prodıýseri. Al ózderi klıpke mýzykanyń avtory Eskendir Hasanǵalıev dep jazyp qoıǵan. Árıne, osyndaı áreketteri namysqa tıedi. Klıptiń shyqqanyna bir aıdan asty, aınalym júrip jatyr, mıllıondaǵan qaralymy bar. Qazir zańgerler osy máselemen aınalysyp jatyr. Árıne, men báribir jeńemin. Óıtkeni murageri retinde bul bizdiń quqymyz. Men barmyn, anam bar jáne meniń ápkem bar. Barlyǵy bizde zańdy túrde tirkelgendikten, olar da zańdy túrde jaýapqa tartylady. Eger kelissóz durys júrgizilmese sotqa beremiz. Bul isti sońyna deıin aparamyn", — deıdi Birjan Hasanǵalıev.
"Adyrna" ulttyq portaly
