«Astana» halyqaralyq qarjy ortalyǧynyŋ (AHQO) iurisdiksiiasynda Bereke Wanrun Mining Ltd (BWM) atty jaŋa kompaniia tırkeldı. Būl turaly AHQO derekterınde körsetılgen, dep habarlaidy "Adyrna".
Mälımetke säikes, kompaniia metall paidaly qazbalaryn jobalau, barlau jäne öndıru qyzmetterın körsetumen ainalysady.
AHQO mälımetınşe, BWM kompaniiasynyŋ jarǧylyq kapitaly 100 AQŞ dollaryn qūraidy. Ol ärqaisysy 1 dollardan baǧalanǧan 100 aksiiadan tūrady. Kompaniianyŋ ekı iesı bar — QazMetX Ltd. jäne WR Holdings Kazakhstan co. Ltd.
WR Holdings Kazakhstan co. Ltd. kompaniiasynyŋ qūryltaişysy – Wanrun Resources Holding PTE. Ltd.. Singapurdyŋ biznes-anyqtamalyǧy derekterıne säikes, būl kompaniia şetelde tırkelgen jäne salyqtan bosatylǧan. Qūryltaişylary turaly aqparat aşyq derekközderde körsetılmegen.
QazMetX Ltd. kompaniiasy Quat Tanysbaevqa tiesılı. Kompra servisındegı aqparatqa säikes, 2001–2002 jyldary aty-jönı bırdei adam sol kezdegı Qazaqstan Respublikasy premer-ministrınıŋ orynbasary Karim Mäsımovtıŋ kömekşısı bolǧan.
Aşyq derekközderge süiensek, Quat Tanysbaev 2018 jyldan berı Qazaqstan qonaq üiler men meiramhanalar qauymdastyǧynyŋ vise-prezidentı qyzmetın atqaryp keledı. Būǧan deiın ol «Astana-Zelenstroi» basqarma töraǧasynyŋ bırınşı orynbasary, Qazaqstan jas käsıpkerler qauymdastyǧynyŋ bas direktory, Turizm industriiasy komitetınıŋ töraǧasy bolǧan.
