سۋديا نۇرگۇل ساۋلەن موڭعوليانىڭ بايان-ولگي ايماعى دەلۇۇن سۋمىنىندا دۇنيەگە كەلگەن. اكەسى ساۋلەن موڭعول ەلىنە تانىمال دارىگەر ەدى.
10-سىنىپ بىتىرگەن كەزىندە نۇرگۇل اكەسىنە:
- باستىق ەكەنىڭىزدى بىلەيىن! ءسىز مەنى جۇمىسقا تۇرعىزىڭىز، وقۋعا كەتكەنشە ءبىر-ەكى اي بولسىن جۇمىس ىستەي تۇرايىن»، - دەگەن ەكەن.
- «اۋرۋحانانى قايتەسىڭ؟!» دەگەنىنە قاراماستان، قوياردا-قويماي اۋرۋحاناعا ەدەن جۋشى بولىپ كىردىم، – دەيدى نۇرگۇل بۇل تۋرالى ەستەلىگىندە. – ءبىر كۇنى تۇنگى اۋىسىمعا جۇمىسقا شىقتىم. سويتسەم، «بۇگىن ساكەڭ كەزەكشى» دەپ اۋرۋحاناداعى ناۋقاستار مەن مەدبيكەلەر ابىر-سابىر جۇگىرىپ ءجۇر ەكەن. «اكەم كەزەككە شىقسا، سونشاما نە بولىپتى؟» – دەپ ويلاپ، اقىرىن قۇلاق تۇرسەم، ناۋقاستار ۇيلەرىنەن كەلگەن تۋىستارىنا: «تاماق اكەلمەي-اق قويىڭدار، بۇگىن ساۋلەن كەزەكشى»، – دەپ جاتىر ەكەن. ال مەدبيكەلەر اق جەلەڭدەرىنىڭ ىشىنەن كيگەن كالىڭ كيىمدەرىن شەشىپ ابىگەر. اكەمنىڭ ۇيدە وتە جۇمساق بولعانىمەن، تۇزدە وتە قاتال، جۇمىسىنا تالاپشىل ادام ەكەنىن سوندا ءبىر-اق ءبىلدىم. بۇل ماعان ومىرلىك باعدارشام ىسپەتتى بولدى.
1991 جىلى 17 جاسىندا مونعوليادان سەمەيگە كەلىپ، مۇعالىمدەر كوللەدجىنە وقۋعا تۇسەدى. وقىپ ءجۇرىپ، بىتىرەتىن كەزىندە شەتەلگە شىعاتىن تولقۇجاتىن جوعالتىپ الادى. «مونعولياعا ۇيىمە كەتە الماي، جالعىز ءوزىم اشتان-اش، تۋىس-تۋعان جوق، ابدەن قينالدىم. ۇيدەگىلەر مونعوليادان بۇرىنعى تۇرعان جاتاقحاناما تەلەفون سوعىپ، مەنى تابا الماعان. ال مەنى ول جاتاقحانادان وقۋ ءبىتىرىپ كەتۋىمە بايلانىستى باياعىدا شىعارىپ جىبەرگەن. ۇيدەگىلەرگە حابارلاساتىن ەشبىر مۇمكىندىك بولمادى ءتىپتى. ءسويتىپ، ولمەستىڭ كۇنىن كەشىپ، شەتەل تولقۇجاتىنا قول جەتكىزۋ ءۇشىن ۋاقىتشا سەمەيدىڭ ەت كومبيناتىنا جۇمىسقا تۇرۋعا ءماجبۇر بولدىم. ەڭبەكاقىنى جاقسى ءارى تۇراقتى تولەيتىن جەر ەدى. ءسويتىپ، مەن ەت كومبيناتىندا سابىن جاساۋمەن اينالىستىم. سابىن مالدىڭ ىشەك-قارىنىنان جاسالاتىندىقتان، كۇلىمسى ءيىستىڭ ورتاسىندا ەڭبەك ەتۋگە تۋرا كەلدى. وسى جەردەن جاتاقحانا الدىم، – دەيدى ارتتا قالعان قيىن كۇندەرى تۋرالى نۇرگۇل ساۋلەن.
كەيىن قاراعاندىدا زاڭگەرلىك جوعارى ءبىلىم الدى. اتا-اناسى دا اتامەكەنگە ورالدى.
2004 جىلى الماتىدا جوعارعى سوت جانىنداعى سوت تورەلىگى ينستيتۋتىنىڭ ماگيستراتۋراسىنا ءتۇستى. ماگيستراتۋرا قابىرعاسىندا مەملەكەتتىك ءتىل بەدەلىن كوتەرەتىن شارالارعا ارالاسىپ ءجۇردى. ماگيسترلەردى قابىلداۋ شاراسىندا انت بەرۋ ءراسىمىن مەملەكەتتىك تىلدە وتكىزۋ تۋرالى باستاما كوتەردى. ينستيتۋت ىشىندە جانە ماگيسترلەر ورتاسىندا تىلگە بايلانىستى داۋ-داماي تۋىنداعانىمەن، نۇرگۇل ءوز دەگەنىن ورىندايدى. ەڭبەك جولى قاراپايىم ەدەن جۋشىدان باستالىپ، ەت كومبيناتىندا سابىن دا جاساۋدى دا باستان وتكەرگەن قايسار قىز ون شاقتى جىل ەكىباستۇز قالالىق سوتىندا سۋديا بولىپ ەڭبەك ەتتى. موڭعوليادان كەلگەن سۋدياعا سولتۇستىك وڭىردە جۇمىس ىستەۋ وڭاي بولعان جوق اكتسەنتپەن سويلەسە نەمەسە جازۋدان گرامماتيكالىق قاتە جىبەرسە، ورىسشاعا شورقاقتىعىن بەتىنە باسىپ، ارىپتەستەرىنىڭ ءوزى كۇلكى قىلاتىن. ايتسە دە مەن وعان نامىستانباي، تۇنىمەن ورىس تىلىندە ادەبي كىتاپتار وقىپ، وزىنە تالاپ قويۋدان جالىقپادى. بوس ۋاقىتتا سوت ىشىندە جانە قالا دەڭگەيىندە وتەتىن مەملەكەتتىك ءتىلدى ناسيحاتتاۋ شارالارىنىڭ بەل ورتاسىنان تابىلدى. جانە سوتتىڭ ءىس قاعازدارىن، سوت ءىسىن مەملەكەتتىك تىلدە جۇرگىزۋ جۇمىستارىن العا باستىردى.
سوت جۇيەسىنە مەملەكەتتىك ءتىل ماسەلەسىن ەنگىزۋ باعىتىندا اتقارعان جۇمىستارى ءۇشىن قر جوعارعى سوتى تاراپىنان ماداقتاما جانە بۇرىنعى جوعارعى سوت جانىنداعى سوت اكىمشىلىگى جونىندەگى كوميتەت تاراپىنان، استانا قالاسىنىڭ اكىمدىگى اتىنان مەملەكەتتىك تىلگە قوسقان ۇلەسى ءۇشىن العان ماراپاتتارى بار.
2022 جىلدىڭ 7 ماۋسىمىنان قوستاناي وبلىسى جانگەلدى اۋداندىق سوتىنىڭ سۋدياسى قىزمەتىنە كىرگەن نۇرگۇل ساۋلەننىڭ سوت سالاسىنا، مەملەكەتتىك ءتىلدى دامىتۋعا قوسار ۇلەسى زور...
جانارگۇل قادىروۆا
