Sýdıa Nurgúl Sáýlen Mońǵolııanyń Baıan-Ólgıı aımaǵy Delúún sýmynynda dúnıege kelgen. Ákesi Sáýlen Mońǵol eline tanymal dáriger edi.
10-synyp bitirgen kezinde Nurgúl ákesine:
- Bastyq ekenińizdi bileıin! Siz meni jumysqa turǵyzyńyz, oqýǵa ketkenshe bir-eki aı bolsyn jumys isteı turaıyn», - degen eken.
- «Aýrýhanany qaıtesiń?!» degenine qaramastan, qoıarda-qoımaı aýrýhanaǵa eden jýýshy bolyp kirdim, – deıdi Nurgúl bul týraly esteliginde. – Bir kúni túngi aýysymǵa jumysqa shyqtym. Sóıtsem, «búgin Sákeń kezekshi» dep aýrýhanadaǵy naýqastar men medbıkeler abyr-sabyr júgirip júr eken. «Ákem kezekke shyqsa, sonshama ne bolypty?» – dep oılap, aqyryn qulaq túrsem, naýqastar úılerinen kelgen týystaryna: «Tamaq ákelmeı-aq qoıyńdar, búgin Sáýlen kezekshi», – dep jatyr eken. Al medbıkeler aq jeleńderiniń ishinen kıgen kalyń kıimderin sheship ábiger. Ákemniń úıde óte jumsaq bolǵanymen, túzde óte qatal, jumysyna talapshyl adam ekenin sonda bir-aq bildim. Bul maǵan ómirlik baǵdarsham ispetti boldy.
1991 jyly 17 jasynda Monǵolııadan Semeıge kelip, muǵalimder kolledjine oqýǵa túsedi. Oqyp júrip, bitiretin kezinde shetelge shyǵatyn tólqujatyn joǵaltyp alady. «Monǵolııaǵa úıime kete almaı, jalǵyz ózim ashtan-ash, týys-týǵan joq, ábden qınaldym. Úıdegiler Monǵolııadan burynǵy turǵan jataqhanama telefon soǵyp, meni taba almaǵan. Al meni ol jataqhanadan oqý bitirip ketýime baılanysty baıaǵyda shyǵaryp jibergen. Úıdegilerge habarlasatyn eshbir múmkindik bolmady tipti. Sóıtip, ólmestiń kúnin keship, shetel tólqujatyna qol jetkizý úshin ýaqytsha Semeıdiń et kombınatyna jumysqa turýǵa májbúr boldym. Eńbekaqyny jaqsy ári turaqty tóleıtin jer edi. Sóıtip, men et kombınatynda sabyn jasaýmen aınalystym. Sabyn maldyń ishek-qarynynan jasalatyndyqtan, kúlimsi ıistiń ortasynda eńbek etýge týra keldi. Osy jerden jataqhana aldym, – deıdi artta qalǵan qıyn kúnderi týraly Nurgúl Sáýlen.
Keıin Qaraǵandyda zańgerlik joǵary bilim aldy. Ata-anasy da atamekenge oraldy.
2004 jyly Almatyda Joǵarǵy Sot janyndaǵy Sot tóreligi ınstıtýtynyń magıstratýrasyna tústi. Magıstratýra qabyrǵasynda memlekettik til bedelin kóteretin sharalarǵa aralasyp júrdi. Magıstrlerdi qabyldaý sharasynda ant berý rásimin memlekettik tilde ótkizý týraly bastama kóterdi. Instıtýt ishinde jáne magıstrler ortasynda tilge baılanysty daý-damaı týyndaǵanymen, Nurgúl óz degenin oryndaıdy. Eńbek joly qarapaıym eden jýýshydan bastalyp, et kombınatynda sabyn da jasaýdy da bastan ótkergen qaısar qyz on shaqty jyl Ekibastuz qalalyq sotynda sýdıa bolyp eńbek etti. Mońǵolııadan kelgen sýdıaǵa soltústik óńirde jumys isteý ońaı bolǵan joq Akentpen sóılese nemese jazýdan grammatıkalyq qate jiberse, orysshaǵa shorqaqtyǵyn betine basyp, áriptesteriniń ózi kúlki qylatyn. Áıtse de men oǵan namystanbaı, túnimen orys tilinde ádebı kitaptar oqyp, ózine talap qoıýdan jalyqpady. Bos ýaqytta sot ishinde jáne qala deńgeıinde ótetin memlekettik tildi nasıhattaý sharalarynyń bel ortasynan tabyldy. Jáne sottyń is qaǵazdaryn, sot isin memlekettik tilde júrgizý jumystaryn alǵa bastyrdy.
Sot júıesine memlekettik til máselesin engizý baǵytynda atqarǵan jumystary úshin QR Joǵarǵy Soty tarapynan madaqtama jáne burynǵy Joǵarǵy Sot janyndaǵy Sot ákimshiligi jónindegi Komıtet tarapynan, Astana qalasynyń ákimdigi atynan memlekettik tilge qosqan úlesi úshin alǵan marapattary bar.
2022 jyldyń 7 maýsymynan Qostanaı oblysy Jangeldi aýdandyq sotynyń sýdıasy qyzmetine kirgen Nurgúl Sáýlenniń sot salasyna, memlekettik tildi damytýǵa qosar úlesi zor...
Janargúl Qadyrova
