11 mausym künı Türkıstan oblysy Tölebi audany Aqbastau auyly maŋyndaǧy jolda jük kölıgı audarylyp, jürgızuşı tırıdei janyp kettı. Kölık ışınde Şymkent sement zauytyna qarasty tau ken servisınıŋ qyzmetkerı Quanyş Serbaev bolǧan. Marqūmnyŋ artynda jūmysqa jaramsyz nauqas äielı men kämeletke tolmaǧan ekı qyzy qaldy. ”Adyrna” tılşısı oqiǧa ornyna baryp, marqūmnyŋ tuystarynan män-jaidy bılıp qaitty.
Quanyş Serbaev sement zauytyna qarasty tas öndıretın karerge ekı jyl būryn jūmysqa ornalasqan. Kündelıktı näpaqasyn tauyp, onkologiialyq dertke şaldyqqan äielın emdetıp, ekı qyzyn asyrap, üi tūrǧyzu üşın jūmystyŋ qiyndyǧyna qaramai, adal qyzmet etken. Degenmen, 11 mausym künı tılsız jauǧa tötep bere almady.
“Tüskı üşterde ınılerım jylap kırıp keldı. Balamnan aiyrylyp qalǧanymdy estıdım. Men sol jerge baraiyn dedım, menı barǧyzbady. Mıne endı jylap-jylap otyrmyz”, deidı äkesı Jaŋabergen Serbaev.
Marqūmnyŋ äielı Almatyda em aluda. Qaterlı ısık auruynyŋ 4 satysy, metastaz bas miy, ışkı organdaryna jäne süiekke ötken. Kämeletke tolmaǧan 14 jäne 13 jastaǧy ekı qyzy aŋyrap, salynyp-aiaqalmaǧan üiı artynda qaŋyrap qaldy. Qaiǧydan qan jūtqan anasy Qarlyǧaş Mūhanjanqyzy qos nemeresı men nauqas kelınınıŋ bolaşaǧyn uaiymdaidy.
“Balapanymnan aiyrylyp qaldym. Tüs körgendei jaǧdai boldy. Azanda jūmysqa ketıp, kündız tüskı asqa kelıp, odan keiın qaita oralmady. Balamnan aiyryldym, kelınım auru, ekı qyzy bar. Soǧan kömektessın. Balam ketkennen keiın, būlardyŋ taǧdyry qalai bolatynyn bılmeimın”, deidı marqūmnyŋ anasy.
Marqūmnyŋ ömırden ötkenıne ekı apta ötse de, tau ken servisınıŋ basşylyǧy kömek qolyn sozuǧa talpynbaǧan. Oqiǧa bolǧannan keiın jetısıne bır kelıp, odan keiın qaralaryn körsetpegen körınedı.
“Karerde azamatymyz tırıdei janyp kettı. Maşinany būryn eşkım qaramaǧan. Äiteuır aqşa tabu üşın bılgenderın ıstep jatyr. Töleitın ailyqtary da mäz emes. Mekeme basşysy Nūrjan Mamytov alǧaşqy qaitys bolǧannan keiın bır keldı, keiın habar-oşaryz kettı. Orynbasary, ne kömekşısı kelmei otyr. Bız olardan ömır boiyna qamtamasyz etsın, dep talap etpeimız, myna jerge kelıp jaǧdaidy bılu kerek edı.
Maşinanyŋ bırden audarylyp ketuı mümkın emes, miǧa qonbaidy. “Bıreuge jan qaiǧy, bıreuge mal qaiǧy” demekşı, mynda äkesı balasy üşın şyryldap jatyr. Tergeuşılerı anaǧan-mynaǧan tartady. Qane,ädıldık! Bıreudı jylatyp qoiyp otyra almaimyz. Men köp jyl kölık jürgızuşısı boldym. Myna kölık jaramsyz bolǧan, azanda teksermei şyǧarǧan. Kölıktıŋ bölşekterınıŋ barlyǧy eskı. Basşylaryn da ūiat bar ma?”-deidı Şymkent qalasynyŋ bas biı Tolybai İsahūly.
Marqūmnyŋ tuystary apatqa qauıpsızdık talaptary saqtalmaǧany sebep boldy deidı. Tölebi audanynyŋ bas biı Meiramhan Äuelhanūlynyŋ aituynşa, kölıkte tehnikalyq aqau bolǧan.
“Būl jerde kölık qūlaǧannan keiın üş sekundtyŋ ışınde ört şyǧyp, ışınde Quanyş bauyrymyz tırıdei janyp ketken. Örttıŋ neden bolǧany belgısız. Bıraq osydan 300 metr jerde kamera tūrǧan. Sol kameradan jazbasyn körgen kezde üş sekundta ört şyqqan. Būl kölıkte aqau bolǧan.
Al endı qazırgı uaqytta Quanyştyŋ äkesı qiyn jaǧdaida otyr. Quanyş bauyrymyzdyŋ äielı Almatyda ongologiialyq jaman aurumen auyryp otyr. Artynda ekı qyzy, soǧylyp bıtpei jatqan üiı qaldy. Jūmystaǧy basşylaryna aitarlyqtai talaby joq. Tek artynda qalǧan otbasyna qolǧabys qylyp, kömek qolyn sozsa, salynyp jatqan üiın bıtırıp, auyryp jatqan äielıne em aluǧa kömektesse deidı. Äkesı kün demei, tün demei balasynyŋ uaiymymen, kelınınıŋ auruyn, nemerelerın uaiymdap, jüregı qaq aiyryluda. Ol kısınıŋ qinalǧanyn körıp, bız de otyra almadyq. Ol kısı bızdıŋ Töle bi audanynyŋ biler qūramynda”, deidı Meiramhan Äuelhanūly.
Al mekeme basşylary būl ıske qatysty jauap bermedı. Tek tau ken servisınıŋ bölım basşysy Aitqūl Maqsat oqiǧa bolǧan kündı eske aldy.
“Saǧat üş jarymdar şamasynda küzetten habar keldı. Osynda tütın şyǧyp jatyrǧanyn aitty. Bız üş jıgıt bolyp kelsek, kölıktıŋ örtenıp jatqanyn kördık. Alǧaşynda ışınde adamnyŋ bar-joǧyna köz jetkıze almadyq. Jarty saǧattan keiın jedel järdem, tötenşe jaǧdailar, polisiia qyzmetkerlerı keldı. Denesın ekspertizaǧa alyp kettı. Bız keştetıp tergeuşılerge aqparat berdık.
Serbaev Quanyşpen bız ekı jyldai qyzmet atqardyq, Öte köŋıldı tiianaqty kısı bolatyn”, dep eske aldy bölım basşysy.
Türkıstan oblystyq eŋbek inspeksiiasy mäiıtke sot-medisinalyq saraptamasy jasalatynyn, sonyŋ qoytyndysy boiynşa jūmys jürgızıletının habarlady. Al marqūmnyŋ tuysqan aǧasy Üsen Serbaev qylmystyq ıste bır şikılık baryn aitady.
“Atalǧan mäsele boiynşa, Töle bi audanyndyq ışkı ıster basqarmasynda tergeu äreketı jürgızılude. Qylmystyq kodekstıŋ 156 babynyŋ 3-şı bölıgımen qylmystyq ıs qozǧalǧan. Alaida osy kezeŋge deiın bızge ol qylmystyq ıspen tanysuǧa eşqandai mümkındık bergen joq. Sebebı, zaŋǧa säikes bızde qūqyq joq eken. Qoǧamdyq qorǧauşy retınde tuysy qatyssyn dep ötınış jasasaq da, ol qabyldanbai jatyr. Jaqyn tuysynan senım hat kerek deidı. Zaŋda körsetılgen - eŋ jaqyn tuysy familiiasy bırdei bolsa, ol qabyldanu kerek, bıraq ondai bolmai jatyr. Qazırgı taŋda osy ıs boiynşa qorǧauşy taǧaiyndadyq. Keşe baryp, ūsynys tastadyq. Jäbırlenuşı retınde äkesı tanyldy. Al ıste jäbırlenuşı dep qaitys bolǧan Serbaev Quanyş dep jazyp qoiǧan. Sonymen qatar, küdıktı retınde eşkım tanylmaǧan. Osy mäsele boiynşa bır qūqyqtyq şara qoldanu kerek dep oilaimyn”, deidı Üsen Serbaev.
Dana Nūrmūhanbet
”Adyrna” ūlttyq portaly
