ەنەرگەتيكا ءمينيسترى جانار-جاعارماي باعاسىن وزگەرتۋ بويىنشا ارنايى بۇيرىققا قول قويدى. جاڭا قۇجاتقا سايكەس، قازاقستاننىڭ بارلىق ايماعىندا جانارماي مەن ديزەل وتىنىنىڭ شەكتى باعاسى وزگەرەدى، دەپ حابارلايدى «ادىرنا» ۇلتتىق پورتالى.
ەنەرگەتيكا ءمينيسترىنىڭ ءباسپاسوز قىزمەتى حابارلاعانداي، اي-80-ءنىڭ شەكتى باعاسى ليترىنە 89 تەڭگەنى، اي-92 جانە اي-93 قوستاناي، سولتۇستىك قازاقستان وبلىستارىندا – ليترىنە 187 تەڭگە، نۇر-سۇلتان، الماتى، شىمكەنت قالالارىندا، اقمولا، اقتوبە، شىعىس قازاقستان، باتىس قازاقستان، الماتى، اتىراۋ، جامبىل، قاراعاندى، قىزىلوردا، پاۆلودار، تۇركىستان، ماڭعىستاۋ، اباي، جەتىسۋ، ۇلىتاۋ وبلىستارىندا – ءليترى 182 تەڭگە قۇرايدى.
ال ديزەل وتىنى (جازعى، ماۋسىمارالىق): اقمولا، اقتوبە، شىعىس قازاقستان، باتىس قازاقستان، قوستاناي، سولتۇستىك قازاقستان وبلىستارىندا، سونداي-اق اباي وبلىسىندا – ليترىنە 260 تەڭگە; نۇر-سۇلتان، الماتى، شىمكەنت قالالارىندا، الماتى، اتىراۋ، جامبىل، قاراعاندى، قىزىلوردا، پاۆلودار، تۇركىستان، ماڭعىستاۋ، سونداي-اق جەتىسۋ، ۇلىتاۋ وبلىستارىندا – ءليترى 230 تەڭگەدەن تۇرادى.
بۇل رەتتە اي-95 جانە قىسقى ديزەل وتىنىنىڭ باعاسىن رەتتەۋ قولدانىلمايدى.
وسى بۇيرىق العاشقى رەسمي جاريالانعان كۇنىنەن باستاپ قولدانىسقا ەنگىزىلەدى جانە كۇنتىزبەلىك 180 كۇن ىشىندە قولدانىلادى. ياعني، مۇنداي باعالار 2023 جىلدىڭ قاڭتار ايىنىڭ باسىنا دەيىن بەكىتىلەدى.
قۇجاتتا مۇناي ونىمدەرىن بولشەك ساۋدادا وتكىزۋ كورسەتكىشى مۇناي مەن مۇناي ونىمدەرىنىڭ الەمدىك باعاسى، ەۋروپالىق نارىقتارعا تاسىمالداۋ شىعىندارى، اكتسيزدەر، وپەراتسيالىق جانە باسقا دا شىعىستار ەسكەرىلەتىن فورمۋلا بويىنشا ايقىندالاتىنى اتاپ وتىلگەن.
«ادىرنا» ۇلتتىق پورتالى
