بۇگىن نۇر-سۇلتان قالاسىندا وتكەن حالىقارالىق تۇركى اكادەمياسى عىلىمي كەڭەسىنىڭ كەزەكتى V وتىرىسى بارىسىندا وزبەكستان رەسپۋبليكاسى حالىقارالىق ۇيىمعا رەسمي تۇردە باقىلاۋشى مارتەبەسىنە يە بولدى. وسىعان وراي، حالىقارالىق تۇركى اكادەمياسىنىڭ عيماراتى الدىندا وزبەكستاننىڭ مەملەكەتتىك تۋىن سالتاناتتى كوتەرۋ ءراسىمى ءوتتى.
سالتاناتتى جيىنعا تۇركى مەملەكەتتەر ۇيىمىنىڭ حالىقارالىق تۇركى اكادەمياسىنىڭ باسشىسى دارحان قىدىرالى، ازەربايجان رەسپۋبليكاسىنىڭ ءبىلىم ءمينيسترى ەمين امرۋللاەۆ، قازاقستان رەسپۋبليكاسىڭ عىلىم جانە جوعارعى وقۋ ءمينيسترى ساياسات نۇربەك، قىرعىز رەسپۋبليكاسىنىڭ ءبىلىم جانە عىلىم ءمينيسترى المازبەك بەيشەناليەۆ، وزبەكستان رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى سايديكرام نيازحودجاەۆ، سونىمەن قاتار ازەربايجان رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى اعالار اتاموعلانوۆ، رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى داستان ديۋشەكەەۆ، تۇركى مەملەكەتتەرى ۇيىمى اقساقالدار كەڭەسىنىڭ مۇشەسى يكرام ادىربەكوۆ، ماجارستان مەن تۇركيا ەلشىلىگىنىڭ ديپلوماتتارى، مەملەكەت جانە قوعام قايراتكەرلەرى، بەلگىلى عالىمدار مەن تۇركولوگتار، قازاقستانداعى دياسپورا جانە باق وكىلدەرى قاتىستى.
تۇركى اكادەمياسىنىڭ عيماراتىندا وتكەن رەسمي جيىندا ۇيىم پرەزيدەنتى دارحان قىدىرالى وزبەكستان رەسپۋبليكاسىنىڭ قازاقستانداعى ەلشىسى سايديكرام نيازحودجاەۆتان وزبەكستاننىڭ مەملەكەتتىك تۋىن قابىلداپ الىپ، ارنايى تۋ تۋعىرعا سالتاناتتى كوتەرۋ ءراسىمىن جاسادى. وسىلايشا تۇركى الەمىنىڭ عىلىمي-ينتەللەكتۋالدى ورتالىعى سانالاتىن تۇركى اكادەمياسى ىرگەسىن كەڭەيتىپ، عىلىمي ينتەگراتسيا اۋقىمىن جاڭا بەلەسكە كوتەردى.
ايتا كەتۋ كەرەك، 2019 جىلدىڭ تۇركى ىنتىماقتاستىق ۇيىمىنىڭ (سول كەزدەگى تۇركى كەڭەسى) باكۋ قالاسىندا وتكەن 8-ءشى سامميتتىندە وزبەكستان ۇيىمعا تولىققاندى مۇشە بولىپ قابىلداندى. وسىعان وراي، ىنتىماقتىستىق اياسىندا وزبەكستان تاراپى تۇركى اكادەمياسىنا باقىلاۋشى مەملەكەت مارتەبەسىن الۋ ءۇشىن رەسمي ءوتىنىم بەردى. بۇعان دەيىن حالىقارالىق تۇركى اكادەمياسىنا تۇركى الەمىنىڭ ەلدەرىمەن ىنتىماقتاستىق ينستيتۋتتارى اراسىندا باقىلاۋشى مارتەبەسىنە ءوتىنىش قابىلداعان العاشقى ۇيىم ماجارستان بولعان ەدى.
