الماتى پروكۋراتۋراسى ءسابي ساتۋ تۋرالى قىلمىستىق ءىس تەرگەۋىنىڭ كەي ءمان-جايلارىن ايتتى، دەپ حابارلايدى “ادىرنا” ۇلتتىق پورتالى كتك تەلەارناسىنا سىلتەمە جاساپ.
ەلىمىزدە ءسابي ساۋدالايتىن شەتەلدىك سايت جۇمىس ىستەپ تۇرعان. 21 مەن 25 جاستاعى الماتىلىق ەكى كەلىنشەك جاڭا تۋعان نارەستەسىن ساتىپ ۇلگەرگەن. پروكۋراتۋرا ءدال وسىنداي 50-گە جۋىق حابارلاندىرۋ انىقتالعان ينتەرنەت رەسۋرستىڭ جۇمىسىن توقتاتىپ، قازىر قىلمىستىق توپتى ىزدەستىرىپ جاتىر.
سايتتا سابيىنەن باس تارتقاندارمەن قوسا، اسىراپ العىسى كەلەتىن كەلىنشەكتەردىڭ دە وتىنىشتەرى قاپتاپ ءجۇر. دەگەنمەن قۇزىرلى ورىنداردىڭ قۇرىعىنا ىلىككەن جەلى قىزمەتكەرلەرى ءىزىن جاسىرۋ ءۇشىن پاراقشالارىن ءوشىرىپ ۇلگەرگەن. زاڭسىز ارەكەتكە بارعانداردىڭ ءىسى ەندى سوتتا قارالماق.
انىقتالعانداي سايت 2013 جىلى تىركەلىپتى. بىراق ەلىمىزدە جۇمىس جۇرگىزگەنىنە جارتى جىل عانا بولعان. سونىڭ وزىندە جاسىرىن ارەكەتىن ءساتتى جۇرگىزىپتى. ساۋداعا تۇسكەندەردىڭ دەنى – 1 جاسقا دەيىنگى بالالار. ال ءوز نارەستەسىنەن جەرىپ، ساۋداعا سالعاندار – 20 بەن 35 جاس ارالىعىنداعى ايەلدەر. قولعا تۇسكەن ەكى كەلىنشەكتىڭ ءبىرى الماتى قالاسىنان بولسا، ەكىنشىسى تۇركىستان وبلىسىنىڭ تۋماسى ەكەن.
«ءبىرىنشىسى ءسابيدى باسقا اتاانالاردىڭ قولىنا بەرىلگەن فاكتىسى انىقتالدى. ەكىنشى فاكتى بويىنشا دۇنيەگە اكەلگەن انا بالانى باسقا اتا-اناعا بەرۋدەن باس تارتتى. ونى ءوز اتا-اناسى باعىپ قارايتىن بولدى. قازىرگى تاڭدا الاتاۋ اۋدانى بويىنشا سابيلەردى ساتۋ يا بولماسا ساتىپ الۋ فاكتىلەرى انىقتالعان جەلى انىقتالعان بولاتىن. ءبىزدىڭ ۇسىنىسىمىز تولىعىمەن قاناعاتتاندىرىلدى. قازىرگى تاڭدا ول سايت توقتاتىلدى»، - دەدى الاتاۋ اۋدانىنىڭ پروكۋرورى ءىزباسار ماساقباەۆ.
”ادىرنا” ۇلتتىق پورتالى
