ورال قالاسىنداعى وبلىستىق پەريناتالدىق ورتالىقتا ۇشەم دۇنيەگە كەلدى. بۇل تۋرالى inform.kz حابارلادى، دەپ جازادى "ادىرنا" ۇلتتىق پورتالى.
اقمارال جۇمازوۆا 30 ماۋسىم كۇنى ءۇش قىز تاپتى. كوپبالالى وتباسى باتىس قازاقستان وبلىسى، جانىبەك اۋدانى، جانىبەك اۋىلىندا تۇرادى. ۇشەمنىڭ اكەسى ەلدوس بازاربايۇلىنىڭ ايتۋىنشا، ولاردىڭ بۇدان بۇرىن ءبىر ۇل، ءبىر قىزى بار ەكەن. ەندى، مىنە، اقمارال ەكەۋى بەس بالانىڭ اتا-اناسى اتاندى. قازىرگى كەزدە اقمارال مەن قىزدارى دارىگەرلەردىڭ باقىلاۋىندا. ءامينا، ءرامينا، ءمادينا اتانعان سابيلەردىڭ سالماعى 2600, 2400 جانە 1900 گرامم.
«ومىرگە ءسابي اكەلۋ وڭاي ەمەس. ايتەۋىر ءبارى ويداعىداي بولعانىنا قۋانىشتىمىز. ەندى بالالارىمىز امان-ەسەن ءوسىپ كەتسە، ءبىز ءۇشىن سول باقىت»، دەيدى ەلدوس بازاربايۇلى.
ۇشەمنىڭ اكەسى ەلدوس بازاربايۇلى اۋداندىق مەكتەپتەن تىس جۇمىستار ورتالىعىندا ۇستازدىق ەتۋمەن بىرگە قولونەرمەن دە اينالىسادى. استاۋ، بەسىك، دومبىرا جاساۋدىڭ حاس شەبەرى. ۇشەمنىڭ اناسى اقمارال تالعاتقىزى 1-مەكتەپ-ليتسەيدە فيزيكا پانىنەن ءدارىس بەرەدى.
"ادىرنا" ۇلتتىق پورتالى
