بولات نازارباەۆ باسىپ العان "التىن وردا" بازارىنىڭ داۋى باسىلار ەمەس

4107
Adyrna.kz Telegram

بولات نازارباەۆ باسىپ العان "التىن وردا" بازارىنىڭ داۋى باسىلار ەمەس. وسى ماسەلەگە بايلانىستى بىرقاتار قوعام بەلسەندىلەرى نۇر-سۇلتان قالاسىندا ارنايى ءباسپاسوز ءماسليحاتىن وتكىزدى، دەپ حابارلايدى "ادىرنا" ۇلتتىق پورتالى. 

مەملەكەت باسشىسى اقپان ايىندا رەيدەرلىككە ۇرىنعان "التىن وردا" بازارىن تارتىپكە كەلتىرۋ تۋرالى تاپسىرما بەرىپ، ءساۋىر ايىندا بازار باسشىلىعى اۋىسقانىمەن ساۋدا ورنىندا زاڭ بۇزۋشىلىقتار تىيىلماي وتىر.

زاڭگەر داۋرەن عابدۋلدىڭ ايتۋىنشا، كورشى ەلدەردەن كەلگەن توپتار بازارعا بيلىك جۇرگىزىپ، قولدان قىمباتشىلىق جاسالىپ وتىر.

 «باسشىلىقتىڭ اۋىسقانىنىڭ ءوزى ۇلكەن كۇمان تۋعىزىپ وتىر. ءساۋىر ايىنان باستاپ التىن وردادا باعا تومەندەدى مە؟ ءبىز كۇتكەندەي وزگەرىس بولدى ما؟ جوق! بۇل شاعىن ساۋدا ورنى ەمەس قوي، ءىرى لوگيستيكالىق توراپ. الماتى، الماتى وبلىسىن قامتاماسىز ەتىپ وتىرعان ساۋدا ورنى. بۇل كەم دەگەندە 3 ميلليون ادام. ەگەر ول جەردىڭ جۇمىسىندا اقاۋ بولسا، بۇل ارقايسىمىزدىڭ ۇستەلىمىزدەگى نانىمىزعا، جەپ وتىرعان ەتىمىزگە دەيىن اسەر ەتەدى»، - دەپ مالىمدەدى زاڭگەر داۋرەن عابدۋل.

ەستەرىڭىزگە سالا كەتەيىك، بۇعان دەيىن الماتى قالاسىنىڭ تۇرعىندارى ناۋرىز ايىندا التىن-وردا بازارىنىڭ الدىنا جينالىپ، بولات نازارباەۆتان التىن-وردا بازارىن بۇرىنعى يەسىنە قايتارۋدى تالاپ ەتكەن بولاتىن. 

"ادىرنا" ۇلتتىق پورتالى 

پىكىرلەر