«التىن وردانىڭ» قۇرىلتايشىلار قۇرامىندا ەكونوميكالىق تەرگەۋ دەپارتامەنتىنىڭ ەكس قىزمەتكەرى بار

2043
Adyrna.kz Telegram

الماتىداعى اتىشۋلى «التىن وردا» بازارىنىڭ توڭىرەگىندەگى داۋ باسىلماي تۇر. كەرىسىنشە ءورشىپ بارادى. قىزىعى، بۇل بازاردىڭ قۇرىلتايشىلار قۇرامىندا ەكونوميكالىق تەرگەۋ دەپارتامەنتىنىڭ ەكس قىزمەتكەرى دە بار ەكەن.

كورشى ەلدەردەن كەلگەن بەلگىسىز توپتار بازاردى وزدىگىنشە ءبولىپ الىپ، بيلىگىن جۇرگىزىپ جاتىر. وسىعان وراي دابىل قاعىپ، ەلوردادا ءباسپاسوز ءماسليحاتىن وتكىزگەن زاڭگەر داۋرەن عابدۋل مۇنداعى ۇنەمى جازاسىز قالاتىن ۇرلىق-قارلىق پەن قولدان جاسالعان قىمباتشىلىققا وسى توپتاردىڭ قاتىسى بار دەيدى.

شاعىمدانعان ساۋداگەرلەر «التىن وردانىڭ» قازىرگى قوجايىنى ءتيىستى جۇمىستاردى جۇرگىزە الماي جاتقانىن اقپارات قۇرالدارىنا جەتكىزگەن. ال زاڭگەر كومپانيادا 95 پايىز ۇلەسى بار استاناداعى ەكونوميكالىق تەرگەۋ دەپارتامەنتىنىڭ بۇرىنعى قىزمەتكەرى ءحامزيننىڭ قۇرىلتايشىلار قۇرامىنا قالاي كىرگەنى بەلگىسىز دەپ وتىر.

بۇل زاڭسىزدىقتارعا بازاردىڭ قازىرگى يەلەرى جاۋاپ بەرىپ، ءتارتىپ ورناتۋعا مىندەتتى ەكەنىن قاداپ ايتتى.

«بۇل – ءىرى لوگيستيكالىق توراپ. الماتى قالاسى مەن وبلىسىن قامتاماسىز ەتىپ وتىرعان ساۋدا ورنى. بۇل كەم دەگەندە 3 ميلليون ادام. بۇل – ستارتەگيالىق نىسان. ەگەر ول جەردىڭ جۇمىسىندا اقاۋ بولسا، بۇل ارقايسىمىزدىڭ ۇستەلىمىزدەگى نانىمىزعا، جەپ وتىرعان ەتىمىزگە دەيىن اسەر ەتەدى. سوندىقتان «التىن وردانىڭ» تاعدىرى ارقايسىمىزدى الاڭداتۋى كەرەك»، – دەيدى زاڭگەر داۋرەن عابدۋل.

ايتا كەتۋ كەرەك، وسىدان 3 اي بۇرىن كەلگەن جاڭا قوجايىن بازاردىڭ ورتاداعى ادامداردىڭ قاتىسۋىمەن كوتەرىلەتىن باعالارعا قاتىستى بىلىقتارىن جويۋعا ۋادە ەتكەن.

«التىن وردانىڭ» بۇرىنعى قۇرىلتايشىلارىنىڭ ۇستىنەن «2017 جىلى بازاردى رەيدەرلىك جولمەن تارتىپ الدى» دەگەن ارىز تۇسكەن بولاتىن. زاڭگەر داۋرەن عابدۋلدىڭ ايتۋىنشا، قازىر ساۋدا ورىننىڭ ەكس-باسشىلارى بازاردى قايتارىپ الۋعا كۇش سالىپ جاتقانىن جەتكىزدى.

«بازاردىڭ باسشىلىعى اۋىسىپ، ءبارى وزگەرەدى، جالعا الۋشىلار جاقسى ءومىر سۇرە باستايدى، تاۋارلاردىڭ باعاسى تۇسەدى دەپ ويلادىق. ءساۋىر ايىنان بەرى «التىن وردادا» باعا تومەندەدى مە؟ ءبىز ءتارتىپتى قوعام ارقىلى ورناتۋىمىز قاجەت. سەبەبى، باسشىلىقتىڭ اۋىسقانىنىڭ ءوزى كۇدىك ۇيالاتادى»، – دەيدى زاڭگەر.

پىكىرلەر