شىلدەنىڭ ءبىرىنشى جەكسەنبىسى – ۇلتتىق دومبىرا كۇنى. «الاتاۋ» ءداستۇرلى ونەر تەاترى ۇلتتىق اسپابىمىزدى ۇلىقتاۋ ماقساتىندا «ءان دومبىرا» اتتى ادەبي-سازدى كەش وتكىزدى. تەاتردىڭ ديرەكتورى – رينات زايتوۆ، كوركەمدىك جەتەكشىسى – جۇلدىزبەك جۇمانباي، رەجيسسەرى – نۇرجان تۋتوۆ.
تۇركىتانۋشى عالىم قارجاۋباي سارتقوجاۇلى ءوزىنىڭ «ەرتە ورتا عاسىردان جەتكەن مادەني مۇرا تۇركi تاريحىنىڭ كونەدەن تامىر تارتاتىندىعىنا ناقتى دالەل بولا الادى» اتتى ماقالاسىندا سەنساتسيالىق وقيعا بويىنشا «تۇركى بابالار V عاسىردا قولىنا ۇستاپ، كۇي تولعاعان ابىز دومبىرا التاي تاۋىنىڭ ءبىر سىرلى ۇڭگىرىنەن تابىلدى. قازاق ساز اسپابىنىڭ بىرەگەيى قۇدىرەتتى قارا دومبىرا ءبىزدىڭ زامانىمىزدىڭ V عاسىرىندا جاسالعان ءتولتۋما بەينەسىمەن، مىنە، ءبىزدىڭ قولىمىزعا ءتۇسىپ وتىر»، – دەيدى. كۇيشى-زەرتتەۋشى مۇرات ابۋعازىنىڭ «دومبىرا اسپابىنىڭ شىعۋ تەگى جايىندا» اتتى جازباسىندا «ەجەلگى تۇرىك داۋىرىندە دومبىرا اسپابى كەڭىنەن قولدانىسقا يە بولعاندىعىن وسى كەزەڭنىڭ جادىگەرلەرى سانالاتىن ەسكەرتكىشتەر بالبال تاستارعا، قىلىش-قانجار سىندى قارۋ-جاراقتاردىڭ سابىنا قاشالىپ سالىنعان دومبىرا اسپابىن ۇستاپ تۇرعان ادام بەينەلەرىنەن كورۋگە بولادى»، – دەپ كورسەتىلگەن. دومبىرانىڭ ءتۇپ-تامىرى عاسىرلار قويناۋىنان باستاۋ الاتىنىن وسىدان-اق اڭعارۋعا بولادى.
دومبىرا – قازاقتىڭ قۇندى بايلىعى، ۇلتتىق ءيميدجدى قالىپتاستىرۋشى قۇرال. دومبىرا جاساي بەرسىن، قازاق ەلى!
قۋانىش جۇمابەكۇلى «الاتاۋ» ءداستۇرلى ونەر تەاترى ادەبيەت ءبولىمىنىڭ مەڭگەرۋشىسى
