بۇگىن، 10 شىلدە كۇنى قوناەۆ قالاسىندا تۋرنيككە تارتىلۋدان رەسپۋبليكالىق «Tartyl Fest» سپورت فەستيۆالى ءوتتى، دەپ جازادى "ادىرنا" ۇلتتىق پورتالى.
سايىستا جاسى مەن سالماعىنا قاراي 9 كاتەگوريا بويىنشا 180-گە جۋىق ادام سىنعا ءتۇستى. قاتىسۋشىلاردىڭ دەنى قوناەۆ قالاسى مەن قالا ماڭىنداعى اۋىل تۇرعىندارى.
اۋەسقويلار اراسىنداعى ءتۋرنيردىڭ قورىتىندىسى بويىنشا 27 جۇلدەگەر انىقتالدى. تۋرنيككە ەڭ كوپ تارتىلعان ادام – راميل ابليزوۆ. ول 37 رەت تۋرنيككە تارتىلىپ، قالالىق جارىستا ۇزدىك اتاندى.
ال، 10 رەت تۋرنيككە تارتىلعان 81 جاستاعى ۆالەري يۋريحين جارىستىڭ ەڭ ەگدە قاتىسۋشىسى اتانىپ، ارنايى سىيلىققا يە بولدى.
قالالىق جارىستىڭ جالپى جۇلدە قورى – 3 400 000 تەڭگە. ءبىرىنشى ورىنعا – 200 000, ەكىنشى ورىنعا – 100 000 جانە ءۇشىنشى ورىن العان جۇلدەگەرلەرگە 50 000 تەڭگە كولەمىندە قارجىلاي جۇلدە تابىستالدى.
ەسكە سالا كەتەيىك، اتالعان شارا قازاقستان رەسپۋبليكاسى پرەزيدەنتى جانىنداعى «Dara» دارىندىلاردى قولداۋ قورىنىڭ» ۇيىمداستىرۋىمەن ەلىمىزدە تۇڭعىش رەت وتكىزىلىپ وتىر. سپورتتىق سايىس ەلىمىزدىڭ 20 قالاسىندا جالاۋىن كوتەرىپ، 6 قىركۇيەككە دەيىن جالعاسادى.
ايماقتاردان توپ جارعان مىقتىلار نۇر-سۇلتان قالاسىندا وتەتىن گراند-فينالعا جولداما الادى. گراند-فينالدىڭ جۇلدە قورى – 54 000 000 تەڭگە. جارىس قورىتىندىسى بويىنشا گراند-فينال جەڭىمپازدارى الەم چەمپيوناتىنا قاتىسىپ، حالىقارالىق دودادا قازاقستاننىڭ نامىسىن قورعايدى.
سايىسقا قاتىسۋ ءۇشىن ءوتىنىشتى www.daraqory.kz اقپاراتتىق سايتىنا جولداۋعا بولادى. فەستيۆال تۋرالى تولىق اقپارات تا وسى پورتالدا.
"ادىرنا" ۇلتتىق پورتالى
