5 جەلتوقسان كۇنى ساعات 12:00-دە قازاق سپورت جانە تۋريزم اكادەمياسىندا قازاقستان ۇلتتىق ستۋدەنتتەر سپورت وداعىنىڭ پرەزيدەنتى قايرات زاكيريانوۆتىڭ قاتىسۋىمەن ءباسپاسوز ءماسليحاتى ءوتتى.
ءماسليحاتتا ول 2026 جىلى ەلىمىزدە بوكستان ستۋدەنتتەر اراسىندا الەم چەمپيوناتى ءوتۋى مۇمكىن ەكەنىن مالىمدەدى.
العاش رەت مۇنداي قۇرىلىقارالىق سپورت دوداسى قازاقستاندا 2006 جىلى وتكەن ەكەن. مىنە، اراعا 20 جىل سالىپ، ەلىمىز وسى چەمپيوناتتى قايتا وتكىزۋگە نيەت تانىتىپ وتىر.
بۇل ماسەلە 28 قاراشادا قىتايدىڭ ماكاو قالاسىندا ازيا ۋنيۆەرسيتەتىك سپورت فەدەراتسياسىنىڭ باس اسسامبلەياسىندا حالىقارالىق ۋنيۆەرسيتەتتەر سپورت فەدەراتسياسى تاراپىنان الداعى الەم چەمپيوناتىن قازاقستاندا وتكىزۋ تۋرالى ۇسىنىسىنان كەيىن تۋىنداعان.
«بۇل ءىرى سپورت ۇيىمدارى ەلىمىزدە بوكستىڭ دامۋىنا نازار اۋدارا كەلە، قازاقستانعا ۇلكەن سەنىم ارتىپ وتىر»، - دەدى زاكيريانوۆ.
ودان ءارى، ول قازىرگى الەمدە بوكس فەدەراتسيالارى اراسىندا بولىپ جاتقان كوپشىلىككە بەيمالىم ءبىرشاما ماسەلەلەر تۋرالى ايتتى.
«قازىر حالىقارالىق وليمپيادا كوميتەتى مەن AIBA اراسىندا شيەلەنىستى جاعداي ورنادى. وليمپيادا كوميتەتى 2019 جىلى ونى وليمپياداعا قاتىستىرۋدان شەتتەدى. بۇل الەمدىك بوكستىڭ دامۋىنا كوپتەگەن كەدەرگىلەر تۋعىزۋدا. بۇل ۇيىمنىڭ جەتەكشىلىگىنە 2020 جىلى رەسەي كاسىپكەرى ۋمار كرەملەۆ تاعايىندالعان. بىراق، 2022 جىلعى رەسەيدەگى ساياسي جاعدايلارعا بايلانىستى ەكى ارادا قايشىلىق تۋىنداعان. سوندىقتان ستۋدەنتتەر اراسىنداعى بوكستان وتەتىن كەلەسى چەمپيونات وتانداسىمز گەننادي گولوۆكين باسقاراتىن World Boxing حالىقارالىق ۇيىمىنىڭ وتكىزىلۋى مۇمكىندىگى قاراستىرىلۋدا»، - دەدى سپيكەر.
سونىمەن قاتار، ماكاودا 2029 جىلى بۇكىلالەمدىك قىسقى ۋنيۆەرسيادا ويىندارىن قازاقستاندا وتكىزۋ ۇسىنىلعان. بۇل الەمدىك سپورتتا ءبىزدىڭ ەلگە دەگەن سەنىمنىڭ جوعارى ەكەنىنىڭ بەلگىسى.
«وسى چەمپيوناتتى وتكىزۋدىڭ ەلىمىزگە پايداسى بار ما؟» دەگەن سۇراققا مىناداي جاۋاپ بەرىلدى:
-
جاڭادان اشىلعان World Boxing حالىقارالىق ۇيىمىنىڭ الدىندا قازاقستاننىڭ بەدەلى ارتاتىن بولادى;
-
الەمدىك بوكستىڭ ورتالىعىنىڭ ءبىرى رەتىندە ەلىمىزدىڭ حالىقارالىق ستاتۋسىن بەكىتەدى;
-
بۇقارالىق سپورتتى دامىتۋعا ىقپال ەتەدى;
-
جاڭا تالانتتارعا جول اشادى;
-
قازاقستاندىق جانە الەم ۋنيۆەرسيتەتتەرى اراسىنداعى جان-جاقتى بايلانىستى ارتتىرادى;
-
تۋريزم سالاسىنا وڭدى ىقپال ەتەدى;
-
ەلىمىزدەگى سپورت عيماراتتارىن حالىقارالىق ستاندارتتارعا ساي ەتۋگە ىقپالىن تيگىزەدى.
وسى تۇرعىدا، قايرات زاكيريانوۆ 2025 جىلى 15 قاراشادا ورتالىق ازيا ۋنيۆەرسيتەتتەرىنىڭ بوكس فەدەراتسياسىن اشۋ تۋرالى شەشىم قابىلدانعانىن اتاپ ءوتتى. ونىڭ ماقساتى – ورتالىق ازيا ەلدەرى بوكسشىلارىنىڭ ءوز چەمپيوناتتارىن وتكىزۋى جانە نىعايىپ كەلە جاتقان تۇركىتىلدەس مەملەكەتتەر اراسىنداعى ىنتىماقتاستىققا ىقپال ەتۋ.
جاڭا ەرەجەدە «ورتالىق ازيا مەملەكەتتەرى» قاتارىنا ازەربايجان مەن موڭعوليا مەملەكەتتەرىنىڭ ۋنيۆەرسيتەتتەرى دە قوسىلادى ەكەن. بۇنى، ارينە، ەرەكشە اتاپ وتەرلىك وڭدى شەشىم دەپ ساناۋعا بولادى.
«بۇل چەمپيوناتتى وتكىزۋ تۋرالى ۇسىنىس قازاقستان وليمپيادا كوميتەتى مەن الماتى قالاسى اكىمدىگى تاراپىنان قولداۋ تابادى دەگەن ويدامىز»، - دەدى قايرات زاكيريانوۆ ءوز ويىن وپتيميستىك سارىندا تۇيىندەپ.
«باستاعان ىستەرىڭىز ءساتتى بولسىن» دەپ جينالعان قاۋىم تىلەكتەستىك ءبىلدىردى.
ءابدىراشيت باكىرۇلى
