Búgin, 10 shilde kúni Qonaev qalasynda týrnıkke tartylýdan respýblıkalyq «Tartyl Fest» sport festıvali ótti, dep jazady "Adyrna" ulttyq portaly.
Saıysta jasy men salmaǵyna qaraı 9 kategorııa boıynsha 180-ge jýyq adam synǵa tústi. Qatysýshylardyń deni Qonaev qalasy men qala mańyndaǵy aýyl turǵyndary.
Áýesqoılar arasyndaǵy týrnırdiń qorytyndysy boıynsha 27 júldeger anyqtaldy. Týrnıkke eń kóp tartylǵan adam – Ramıl Ablızov. Ol 37 ret týrnıkke tartylyp, qalalyq jarysta úzdik atandy.
Al, 10 ret týrnıkke tartylǵan 81 jastaǵy Valerıı Iýrıhın jarystyń eń egde qatysýshysy atanyp, arnaıy syılyqqa ıe boldy.
Qalalyq jarystyń jalpy júlde qory – 3 400 000 teńge. Birinshi orynǵa – 200 000, ekinshi orynǵa – 100 000 jáne úshinshi oryn alǵan júldegerlerge 50 000 teńge kóleminde qarjylaı júlde tabystaldy.
Eske sala keteıik, atalǵan shara Qazaqstan Respýblıkasy Prezıdenti janyndaǵy «Dara» daryndylardy qoldaý qorynyń» uıymdastyrýymen elimizde tuńǵysh ret ótkizilip otyr. Sporttyq saıys elimizdiń 20 qalasynda jalaýyn kóterip, 6 qyrkúıekke deıin jalǵasady.
Aımaqtardan top jarǵan myqtylar Nur-Sultan qalasynda ótetin grand-fınalǵa joldama alady. Grand-fınaldyń júlde qory – 54 000 000 teńge. Jarys qorytyndysy boıynsha grand-fınal jeńimpazdary álem chempıonatyna qatysyp, halyqaralyq dodada Qazaqstannyń namysyn qorǵaıdy.
Saıysqa qatysý úshin ótinishti www.daraqory.kz aqparattyq saıtyna joldaýǵa bolady. Festıval týraly tolyq aqparat ta osy portalda.
"Adyrna" ulttyq portaly
