قازاقستاندا بالالار جىلىندا بالالاردى ارنايى پسيحولوگيالىق-پەداگوگيكالىق قولداۋمەن قامتۋ 40%-دان اسا كورسەتكىشكە ارتتى.
بۇعان پسيحولوگيالىق-مەديتسينالىق-پەداگوگيكالىق كونسۋلتاتسيالار (پمپك), پسيحولوگيالىق-پەداگوگيكالىق تۇزەتۋ كابينەتتەرى (پپتك), وڭالتۋ ورتالىقتارى مەن لوگوپەديالىق ورتالىقتار جەلىسىن كەڭەيتۋ ىقپال ەتىپ جاتىر.
بىلتىر ورتالىقتارعا 30 مىڭ بالا بارسا، بيىل ولاردىڭ سانى 53 مىڭعا دەيىن ارتىپ وتىر.
قولدانىستاعى پمپك-لاردى كەڭەيتۋ جانە جاڭالارىن اشۋدىڭ ارقاسىندا ارنايى پسيحولوگيالىق-پەداگوگيكالىق قولداۋمەن قامتۋدى ارتتىرۋ مۇمكىن بولدى. مىسالى، بىلتىر ەلىمىزدە 10 پسيحولوگيالىق-پەداگوگيكالىق تۇزەتۋ كابينەتى اشىلعان بولاتىن. ەندى رەسپۋبليكاداعى پپتك-نىڭ جالپى سانى 211-گە جەتتى.
«مەملەكەت باسشىسىنىڭ تاپسىرماسى بويىنشا بالانىڭ دامۋىنداعى پروبلەمالاردى ەرتە انىقتاۋ جانە تۇزەتۋ ءۇشىن قوسىمشا جاعدايلار جاسالىپ جاتىر. ول ءۇشىن قازىر پسيحولوگيالىق-مەديتسينالىق-پەداگوگيكالىق كونسۋلتاتسيالار، پسيحولوگيالىق-پەداگوگيكالىق تۇزەتۋ كابينەتتەرى، وڭالتۋ ورتالىقتارىنىڭ سانى ارتىپ كەلەدى»، - دەپ ايتتى ارنايى جانە ينكليۋزيۆتى ءبىلىم بەرۋدى دامىتۋدىڭ ۇلتتىق عىلىمي-پراكتيكالىق ورتالىعىنىڭ ديرەكتورى ايگەرىم كۇدەرينوۆا.
قر وقۋ-اعارتۋ مينيسترلىگىنىڭ ءباسپاسوز قىزمەتى
