"ەلگە قايراتىلعان قاراجاتتىڭ ءبارى قوعامنىڭ باقىلاۋىندا بولاتىن اشىق قورعا جيناقتالۋى ءتيىس. ۇرىلاردىڭ، جەمقورلاردىڭ بيلىك جۇيەسىن قۇرعان باس ارحيتەكتور نۇرسۇلتان نازارباەۆتىڭ وزىنەن باستاپ بىردە-ءبىر تۋىسقانىن قالدىرماي، تەكسەرۋ جۇرگىزۋ كەرەك! بۇل تەكسەرۋ اشىق جاريا بولۋى كەرەك". بۇل پىكىردى بەلگىلى ساياساتكەر، قوعام قايراتكەرى رىسبەك سارسەنباي Adyrna.kz ۇلتتىق پورتالىنىڭ تىلشىسىنە بەرگەن سۇحباتىندا ايتتى.
"قايرات ساتىبالدى، قايرات بورانباەۆ، گۇلميرا ساتىبالدى دەگەندەردەن جالپى جيىنتىعى 277 ملرد تەڭگە، ياعني 615 ملن دوللار قاراجاتتىڭ كەرى قايتارىلعانى شىن بولسا، ونى راستايتىن قۇجاتتى بيلىك جاريا ەتۋى ءتيىس. ونسىز الدەبىر قويىلىم دەپ ەسەپتەۋگە، سەنىمسىزدىك بىلدىرۋگە قوعامنىڭ تولىق حاقىسى بار. نازارباەۆتىڭ مەملەكەت قازىناسىن توناعان تويىمسىز تۋىستارىنىڭ ەكى-ۇشەۋىن شالا قۇستىرىپ، قالعاندارىنىڭ قالتاسىندا قالدىرۋ ارەكەتىنە جول بەرىلمەۋ كەرەك. بۇلاردىڭ ءبارى دە حالىقتىڭ نەسىبەسىن ملردتاعان تەڭگەمەن ەمەس ملردتاعان دوللارمەن قىمقىرعاندار، قارپىعاندار... سوندىقتان بۇل جەردە "ملردتاعان تەڭگە قايتارىلدى" دەپ الداۋعا بولمايدى. مۇنى قاجەت بولسا "ملردتاعان دوللارمەن" ەسەپتەسىن. سول باعامەن حالىققا جاريا ەتسىن!", - دەيدى ساياساتكەر.
رىسبەك سارسەنبايدىڭ ايتۋىنشا، ەلگە قايتارىلعان قاراجاتتىڭ ءبارى قوعامنىڭ باقىلاۋىندا بولاتىن اشىق قورعا جيناقتالۋى ءتيىس.
"سول قور ارقىلى ءبولىنىپ، قاي قاراجات قانشا كولەمدە قايدا جۇمسالدى؟ جۇرتشىلىققا ەسەپ بەرىلىپ وتىرۋى قاجەت. مىنەكەي، سونداي جاعدايدا عانا ءبىز قايتارىلعان قاراجاتتىڭ تاعى دا ەكىنشى رەت باسقا ءبىر جەمقورلاردىڭ قالتاسىنا ءتۇسىپ كەتپەۋىنە توسقاۋىل قويا الاتىن بولامىز. ۇرىلاردىڭ، جەمقورلاردىڭ بيلىك جۇيەسىن قۇرعان باس ارحيتەكتور نۇرسۇلتان نازارباەۆتىڭ وزىنەن باستاپ بىردە-ءبىر تۋىسقانىن قالدىرماي، تەكسەرۋ جۇرگىزۋ كەرەك! بۇل تەكسەرۋ اشىق جاريا بولۋى كەرەك! وسى ورايدا قوعام تاراپىنان قۇرىلىپ، جۇمىس ىستەپ جاتقان قوعامدىق قور بار. سونداي-اق شەتەلدەگى وسى ىسپەن اينالىسىپ شەتكە قازاقستاننان زاڭسىز اۋدارىلعان ۇرلانعان قاراجاتتاردىڭ سوڭىنا تۇسكەن ىزدەۋشىلەر بار. مىنە، سولاردىڭ ءبارى قازاقستان ىشىندەگى ىنتالى توپتارمەن، جۋرناليستىك زەرتتەۋلەرمەن ءتيىستى مەملەكەتتىك ورگاندارمەن بىرلەسە وتىرىپ، وسى قاراجاتتاردى جيناقتاۋى كەرەك", - دەيدى رىسبەك سارسەنباي.
زارينا اشىربەك،
"ادىرنا" ۇلتتىق پورتالى
