قازىرگى تاڭدا قىزىلوردا وبلىسىندا قۇرىلىس جانە ينجەنەرلىك-كوممۋنيكاتسيالىق ينفراقۇرىلىمدى دامىتۋ جوبالارى جۇزەگە اسىرىلۋدا.
اتاپ ايتقاندا، بيىل وبلىس اكىمىنىڭ تاپسىرماسىنا سايكەس سىر وڭىرىندە ەنەرگەتيكا جانە تۇرعىن ءۇي كوممۋنالدىق شارۋاشىلىعى سالاسىندا 17,3 ملرد.تەڭگەنى قۇرايتىن 106 جوبا جۇزەگە اسىرىلۋدا.
سولاردىڭ ءبىرى قىزىلوردا قالاسىندا كوپبالالى انالارعا پايدالانۋعا بەرىلگەن بايتەرەك تۇرعىن اۋدانىنداعى تۇرعىن سەكتوردىڭ ينجەنەرلىك-كوممۋنيكاتسيالىق ينفراقۇرىلىمىن دامىتۋعا 1 ملرد. 060 ملن. تەڭگە بولىنسە، جاڭاقورعان كەنتىندەگى 10/0,4 كۆ ەلەكترجەلىلىك جۇيەنى جاڭعىرتۋعا 898 ملن. 787 مىڭ تەڭگە قارالعان.
سونىمەن قاتار، قىزىلوردا قالاسى مەن جالاعاش، شيەلى اۋداندارىندا تۇرعىن ءۇيدى جاڭعىرتۋ جۇمىستارىن جۇرگىزۋگە 622 ملن. 160 مىڭ تەڭگە بولىنگەن.
ايتا كەتۋ كەرەك، قىزىلوردا قالاسىنىڭ تۇرعىن ءۇي قورىندا 800-دەن استام كوپقاباتتى تۇرعىن ءۇي بولسا، سوڭعى 10 جىلدىڭ ىشىندە 185 كوپقاباتتى ۇيلەرگە جاڭعىرتۋ جۇمىستارى جۇرگىزىلگەن. بيىلعى جىلى دا وسى جۇمىستاردىڭ جالعاسى رەتىندە وبلىس ورتالىعىنداعى 11 ۇيگە قايتا جاڭعىرتۋ جۇمىستارى جۇرگىزىلەدى.
سونىمەن قاتار بيىل مەملەكەتتىك بيۋدجەت ەسەبىنەن قۇرىلىس سالاسىندا جالپى كولەمى 60,6 ملرد. تەڭگەنى قۇرايتىن 108 جوبا جۇزەگە اسىرۋ جوسپارلانۋدا.
ونىڭ ىشىندە وبلىستىق قۇرىلىس، ساۋلەت جانە قالا قۇرىلىسى باسقارماسى ارقىلى 27, ارال اۋدانىندا 5, قازالى اۋدانىندا 13, قارماقشىدا 13, جالاعاش پەن سىرداريادا 4, شيەلى 5, جاڭاقورعان 2, قىزىلوردا قالاسىندا 35 جوبا جۇزەگە اسىرىلماق.
بۇل جوبالاردىڭ ىشىندە: وبلىستىق قان ورتالىعى، نەكە سارايى، مادەنيەت سالاسىنداعى كوپسالالى كەشەن جانە 2 وقۋ كورپۋستارىنىڭ قۇرىلىسى بار.
ايماق باسشىسى نۇرلىبەك نالىباەۆتىڭ تاپسىرماسىمەن جوبالاردىڭ تيىمدىلىگىن ءارى ساپاسىن قاداعالايتىن ارنايى كەڭەس قۇرىلىپ، جۇمىس جاساۋدا.
بۇل كەڭەستىڭ جۇمىسى ەڭ الدىمەن بيۋدجەت قارجىسىنىڭ ءتيىمدى پايدالانۋىن قاداعالاۋ جانە تۇرعىندار ءۇشىن قاجەتتى نىسانداردى سالۋدى كوزدەيدى.
