سىر وڭىرىندە قازاقستان ۇلتتىق عىلىم اكادەمياسىنىڭ اكادەميگى، ماتەماتيك، پروفەسسور اسقار جۇمادىلداەۆ اتىنداعى جاس ماتەماتيكتەر اراسىنداعى حالىقارالىق بايقاۋ باستالدى. بىلىمدىلەر دوداسىنا ەلىمىزدىڭ جانە كورشىلەس رەسەي، قىرعىزستان، وزبەكستان مەملەكەتىنەن كەلگەن 20 مەن 27 جاس ارالىعىنداعى 100 ماتەماتيك باق سىناماقشى. بۇگىن وڭىرلىك كوممۋنيكاتسيالار قىزمەتىنىڭ اقپارات الاڭىندا بەلگىلى ماتەماتيك اسقار جۇمادىلداەۆ باق وكىلدەرىنە اتالمىش بايقاۋدىڭ نەگىزگى تالاپتارىن ءتۇسىندىرىپ ءوتتى.
- حالىقارالىق بايقاۋدىڭ ماقساتى – جاس ماتەماتيك مۇعالىمدەردىڭ كاسىبي شەبەرلىگى مەن ءبىلىم الۋشىلاردىڭ قابىلەتىن دامىتۋعا باعىتتالادى. بۇل بىلىمدىلەر بايقاۋى 2014-2018 جىلدار ارالىعىندا قىزىلوردا قالاسىنىڭ جاس ماتەماتيكتەرى اراسىندا وتىكىزىلىپ كەلگەن. ال 2019 جىلى بۇل بايقاۋ تۇڭعىش رەت حالىقارالىق دەڭگەيدە ۇيىمداستىرىلدى. بيىل وبلىس اكىمى نۇرلىبەك ماشبەكۇلى نالىباەۆتىڭ قولداۋىمەن بايقاۋعا قاتىسۋشىلار سانى ارتىپ، سايىس جوعارى دەڭگەيدە ۇيىمداستىرىلدى. جالپى ءبىزدىڭ سىر ەلى تەك قاسيەتتى ونەردىڭ عانا ەمەس بىلىمدىلەردىڭ دە ورتاسى. ءبىزدىڭ وڭىردە تالايدى تاڭداي قاقتىرعان مىقتىلار شىققان. سولاردىڭ ءىزىن جالعاستىرۋ ءۇشىن ءبىزدىڭ جاستار ءبىلىم مەن عىلىمعا بەت بۇرۋى كەرەك. بۇگىن باستاۋ الاتىن حالىقارالىق وليمپيادا ناعىز مەتەماتيكتەردى انىقتاۋعا جانە جاس عالىمداردىڭ اتىن شىعارۋعا ۇلكەن مۇمكىندىك بولماق. بىلىمدىلەر دوداسىندا 7 كۇردەلى ەسەپ بولادى. بەرىلگەن ەسەپتەر تەك ءبىزدىڭ عانا بايقاۋعا ارنايى دايىندالعان. سونداي-اق، بيىلعى بايقاۋدىڭ ءبىر ەرەكشىلىگى – قاتىسۋشىلارعا ءوزىم ويلاستىرعان ءبىر ەسەپتى قوياتىن بولامىن. قاتىسۋشى جاستارعا ساتتىلىك تىلەيمىن!، - دەدى اسقار سەرقۇلۇلى.
بريفينگ بارىسىندا فيزيكا ماتەماتيكا عىلىمدارىنىڭ دوكتورى، قازاقستان ماتەماتيكا ءپانى مۇعالىمدەر قاۋىمداستىعىنىڭ پرەزيدەنتى، حالىقارالىق جاۋتىكوۆ وليمپياداسىنىڭ نەگىزىن قالاۋشى قايروش ماقىشوۆ حالىقارالىق بايقاۋ تۋرالى ءوز پىكىرىن جەتكىزدى.
- وزدەرىڭىز بىلەتىندەي، جالپى جاراتىلىستانۋ باعىتى وتە كۇردەلى بولىپ كەلەدى. ونىڭ ىشىندە ماتەماتيكا باعىتىن كەز كەلگەن ءبىلىم الۋشى تەرەڭ مەڭگەرىپ، كۇردەلى ەسەپتەردى شىعارا المايدى. ماتەماتيكانى جاقسى مەڭگەرۋ ءۇشىن ۇشقىر ويلاپ، لوگيكالىق قابىلەتتى دامىتۋ كەرەك. سوندىقتان بۇگىن باستالعالى وتىرعان حالىقارالىق بايقاۋعا ەلىمىز بەن كورشىلەس مەملەكەتتەردە ءوز بىلىمىمەن كوزگە تۇسكەن جاستار قاتىسايىن دەپ وتىر، - دەدى قايروش بەكسەيىتۇلى.
- ەكىنشى مارتە ۇيىمداستىرىلعان حالىقارالىق بايقاۋ مەكتەپ وقۋشىلارىن ماتەماتيكالىق سۇراقتارعا دايىنداۋعا جانە ءبىلىم دەڭگەيىن ارتتىرۋعا، جاستاردىڭ اراسىنداعى ءوزارا دوستىق قارىم-قاتىناستى قالىپتاستىرۋعا ءوز سەپتىگىن تيگىزەدى دەپ ويلايمىن. 2022 جىلى ايماق باسشىسى بەلسەندى جاستارمەن كەزدەسۋ بارىسىندا اتالمىش سايىستى وبلىستىق دەڭگەيدە جانە حالىقارالىق سيپاتتا وتكىزۋ تۋرالى شەشىم قابىلدادى. بايقاۋدىڭ وتكىزىلۋىنە قولداۋ بىلدىرگەن اسقار جۇمادىلداەۆ پەن «قازاقستان ماتەماتيكا ءپانى مۇعالىمدەرى قاۋىمداستىعىنىڭ» ۇجىمىنا العىس ايتامىز، - دەدى وبلىستىق قوعامدىق دامۋ باسقارماسىنىڭ باسشىسى الماسبەك ەسماحانوۆ.
بايقاۋدىڭ جالپى جۇلدە قورى – 3 ملن.600 مىڭ تەڭگە. 1 ورىنعا – 1ملن،تەڭگە، 2 ورىنعا – 500 مىڭ تەڭگە، (2 جەڭىمپازعا), 3 ورىن – 300 مىڭ تەڭگە (2 جەڭىمپازعا), سونداي-اق، بەلسەندىلىك تانىتقان 10 قاتىسۋشىعا 100 مىڭ تەڭگەدەن ىنتالاندىرۋ سىيلىعى تابىستالاتىن بولادى.
وڭىرلىك كوممۋنيكاتسيالار قىزمەتى
"ادىرنا" ۇلتتىق پورتالى
