ەلىمىزدە مەشىت سالاتىن ادامداردىڭ ءبىرازى رۇقسات المايتىندىقتان، زاڭسىز تۇرعىزىلعان مەشىتتەردىڭ سانى ارتىپ جاتىر ەكەن.
شىمكەنت قالاسى مەن تۇركىستان وبلىسىندا 800-دەن اسىپ كەتكەن عيباداتحانالاردىڭ جاي-كۇيى ءدىن قىزمەتكەرلەرى، ءدىن ىستەرى جانە قۇرىلىس باسقارمالارىنىڭ ماماندارى قاتىسقان كەڭەستە تالقىلاندى. ولاردىڭ قانشاسى زاڭدى، قانشاسى زاڭسىز سالىنعانىن شەنەۋنىكتەر ازىرگە انىقتاي العان جوق.
وبلىستا سوڭعى ءۇش جىلدا سەگىز مەشىت سالۋعا رۇقسات بەرىلگەن، قالعانى زاڭسىز سالىنعان، دەيدى ساۋلەت جانە قالا قۇرىلىسى باسقارماسىنىڭ قىزمەتكەرلەرى.
قازاقستاندا بيىلعى جىلدىڭ ساۋىرىندە ءدىني عيماراتتاردىڭ قۇرىلىسىن رەگلامەنتتەيتىن جاڭا نورمالار قابىلداندى. ەندى مەكتەپتەن 300 مەتر اۋماقتا ورنالاسقان بارلىق مەشىت سۇرىلەدى.
"ەگەر ادام زاڭسىز عيباداتحانا سالسا، ول ونى ءوزى ءسۇرۋى ءتيىس. كەيىن ول جەرگە، قۇرىلىس سالۋعا قاجەتتى رۇقساتتاردى الىپ، ءتيىستى ورگانعا حابارلاۋعا مىندەتتى. سودان كەيىن قۇرىلىستى باستاۋعا رۇقسات ەتىلەدى", — دەيدى تۇركىستان وبلىسى ساۋلەت جانە قۇرىلىس باسقارماسىنىڭ باسشىسى باقىتباي دۇيسەبەكوۆ.
مەشىت سالۋ باستاماسىن كوتەرەتىن ادامداردىڭ ءبىرازى رۇقسات المايتىندىقتان، وڭىردە زاڭسىز تۇرعىزىلعان مەشىتتەردىڭ سانى جىل ساناپ ارتىپ جاتىر. سالدارىنان اۋىلدار مەن وكرۋگتەردەگى كەيبىر ءدىني عيماراتتار كوبىنەسە بوس قالادى، دەيدى شەنەۋنىكتەر.
"وبلىستا جانە شىمكەنتتە 800-دەن استام مەشىت بار، كوبىسى بوس قالىپ جاتادى. وعان ادام سانىنىڭ جەتپەۋى نەمەسە قۇرلىس نورماسىنىڭ ساقتالماۋى سەبەپ بولادى. ول مەشىتتەرگە ەشكىم بارماعاندىقتان، ءبىز ونى عيبادات بولمەسىنە اينالدىرامىز", — دەيدى تۇركىستان وبلىسى ءدىن ىستەر باسقارماسىنىڭ باسشىسى سامات ساپارباەۆ.
كەزدەسۋ سوڭىندا شەنەۋنىكتەر مەتسەناتتاردان قانداي دا بىر ءدىني نىساندى سالار كەزدە زاڭ نورمالارىن ساقتاۋدى ءوتىندى. قازاقستاندا ساۋىردە ءدىني عيماراتتاردىڭ قۇرىلىسىن رەگلامەنتتەيتىن جاڭا نورمالار قابىلداندى، دەپ حابارلادى Sputnik. سايتى.
